Þórólfur Guðnason vill herða aðgerðir innanlands. Þetta sagði hann á upplýsingafundi og mun hann skila Svandísi Svavarsdóttur heilbrigðisráðherra minnisblaði í dag.
Hann segist ekki viss hvenær aðgerðirnar myndu taka gildi. Hann segir það alfarið á ábyrgð ráðherra sem ber ábyrgð á málaflokknum að ákveða það. „Ef menn ætla að grípa til aðgerða er eins gott að gera það eins fljótt og hægt er,“ segir Þórólfur.
Sjá einnig: Áslaug svarar fyrir sig og sendir Svandísi pillu
Eins og Hringbraut hefur greint frá skiptust Svandís Svavarsdóttir og Áslaug Arna Sigurbjörnsdóttir á pillum nú á dögunum vegna sóttvarnarmála. Sagði Svandís Sjálfstæðisflokkinn hafa verið með efasemdir um sóttvarnarreglur frá upphafi.
Ekkert hefur heyrst í ríkisstjórninni vegna minnisblaðs Þórólfs og er ekki ljóst á þessum tímapunkti til hvaða aðgerða verður gripið til. Þórólfur sagði á fundinum að hann vildi ekki ræða efnislega þær tillögur sem hann lagði til en sagði þær í ætt við það sem sést hefði áður.