„Hljóð almennt í lögreglumönnum er á þann veg að viðkomandi ætti að hugsa sinn gang og jafnvel að segja af sér. Menn tala í þá áttina,“ segir Arinbjörn Snorrason, formaður Félags lögreglumanna í Reykjavík, á vef Vísis.
Arinbjörn var þar spurður út í ummæli Þórhildar Sunnu Ævarsdóttur, þingmanns Pírata, vegna fánamálsins svokallaða sem kom upp í gær. Óskaði Þórhildur eftir því að fulltrúi lögreglu kæmi á fund allsherjarnefndar Alþingis vegna „rasisma innan lögreglunnar og aðferðir til að sporna við honum“ eins og hún sagði á Alþingi í gær.
„Það að þessi merki hafi komið upp, þá hafa lögreglumenn verið með þetta af einum góðum hug og aldrei í mínum eyrum eða annara sem ég hef rætt við hefur verið talað um rasísk skilaboð, alls ekki,“ sagði Arinbjörn.
Allt hófst þetta eftir að mynd birtist með saklausri frétt af verkefnum lögreglunnar á vef mbl.is í gær þar sem lögreglukona sást með Vínlandsfánann svokallaða á búningnum sínum, en fáninn hefur verið tengdur hægri öfgahyggju. Þá var hún með svokallaða thin blue line-útgáfu af íslenska fánanum á búningnum. Umrædd mynd var tekin árið 2018.
Ásgeir Þór Ásgeirsson, yfirlögregluþjónn hjá lögreglunni á höfuðborgarsvæðinu, sagði í gær að málið væri tekið alvarlega og þegar hefðu verið gefin út fyrirmæli til lögreglumanna við embættið um að fjarlægja allar aukamerkingar af vestum sem lögreglumenn bera við störf sín.
Arinbjörn segist hins vegar telja að ekkert illt liggi að bak umræddum merkingum. Þetta hafi verið gert með þeim skilningi að þetta væri stuðningur eða stuðningsskilaboð um gott málefni. „En alls ekki að þetta væri merki um kynþáttahatur,“ segir hann í frétt Vísis.
