Guðmundur Ingi Kristinsson, þingmaður Flokks fólksins, vísaði í umfjöllun Hringbrautar í gær um mál Önnu Sifjar Ingimardóttur í ræðu sinni á Alþingi í gær.
Eiginmaður Önnu svipti sig lífi á síðasta ári en í pistli sínum skrifaði hún um átakanlega reynslu sína af baráttunni við heilbrigðiskerfið. Eiginmaður hennar var einn af þeim 39 einstaklingum sem sviptu sig lífi hér á landi árið 2019.
Sjá einnig: Átakanleg reynsla Önnu Sifjar: „Eitt mesta áfall sem hugsast getur“
Nú stendur yfir átak Geðhjálpar um að geðheilsa verði sett í forgang innan heilbrigðiskerfisins og alls samfélagsins. Anna skrifaði færsluna til að vekja athygli á stöðu geðheilbrigðismála innan heilbrigðiskerfisins og má segja að pottur sé víða brotinn í þeim efnum.
Í ræðu sinni vísaði Guðmundur einnig í pistil sem Héðinn Unnsteinsson, formaður Geðhjálpar, skrifaði í nýjasta blað Geðhjálpar þar sem hann sagði:
„Ástæða þess að við í Landssamtökunum Geðhjálp, í samstarfi við Píeta samtökin, opinberum töluna núna er tvíþætt. Annars vegar viljum við ræða sjálfsvíg og þann skyndilega missi, sársauka og sorg sem aðstandendur verða fyrir og hins vegar viljum við ræða þá ástæðu sem býr að baki og orsakaþætti geðheilbrigðis.“
Guðmundur segir að í blaðinu hafi einnig komið fram að nánast enginn stuðningur eða úrræði séu í boði fyrir þann hóp barna sem elst upp hjá foreldrum með geðrænan vanda. Þá vísaði hann í grein Önnu Sifjar.
„Kona sem missti eiginmann sinn í fyrra segir orðrétt í grein á Hringbraut, með leyfi forseta:
„Ég er kona með átakanlega reynslu af því að leita allra hugsanlegra leiða til að fá hjálp fyrir fársjúkan mann sem svaf ekki svo vikum skipti og ekki ég heldur, mann sem var með miklar ranghugmyndir, mann sem gat ekki lengur tekið ákvarðanir, mann sem gat ekki lengur hugsað um börnin sín, mann sem hélt ekki lengur uppi samræðum, mann sem var kominn í annan heim en við hin, mann sem hafði aldrei orðið misdægurt en var ekki lengur skugginn af sjálfum sér.“
Guðmundur endaði ræðu sína á þessum orðum: „Geðsjúkdómar eru dauðans alvara og í minningu þeirra 39 og þeirra sem kerfið hefur brugðist stend ég hér í öskrandi þögn. Virðulegur forseti. Komum þessum málum í lag strax.“