„Mér sýnist á ummælum margra vina minna á þessum vettvangi í kvöld, að botnlaus hroki og sjálfsupphafning, með tilheyrandi smásálarskap og fýlu, þyki núorðið merki um sérstaka mannkosti,“ segir Einar Kárason, rithöfundur og varaþingmaður Samfylkingarinnar.
Einar tjáði sig á Facebook í gærkvöldi um viðtal Kastljóss við Kára Stefánsson, forstjóra Íslenskrar erfðagreiningar. Í viðtalinu fór Kári mikinn og gagnrýndi hann til að mynda Svandísi Svavarsdóttur heilbrigðisráðherra harðlega. Sagði hann að á stundum hegði hún sér eins og „lítil tíu ára stelpa sem lætur ekki neinn segja sér neinn skapaðan hlut.“
Sjá einnig: Þykir Einar hafa sýnt Kára ófaglega framkomu
Kári sagði enn fremur að Íslensk erfðagreining myndi ekki koma að skimunum á Keflavíkurflugvelli ef verkefnið yrði unnið undir stjórn heilbrigðisráðuneytisins.
Gagnrýndi hann það enn fremur að enginn hefði leitað til Íslenskrar erfðagreiningar um verkefnið á Keflavíkurflugvelli þó fyrirtækið hefði framkvæmt flestar skimanir hér á landi vegna COVID-19. Þá sagði hann að starfsfólki fyrirtækisins hefði sárnað þegar Svandís minntist ekki á Íslenska erfðagreiningu í þakkarræðu sinni á síðasta upplýsingafundinum sem haldinn var í vikunni.
Vann stórkostlegt afrek
Þó Einar Kárason nefni Kára ekki á nafn í færslu sinni er augljóst að hann er að vísa til viðtalsins í Kastljósi í gærkvöldi. Fjörugar umræður hafa spunnist við færsluna og blandar Brynjar Níelsson, þingmaður Sjálfstæðisflokksins, sér í þær:
„Ég var um það bil að pósta eins færslu, Einar. Nú get ég hætt við og þú situr einn uppi með skammirnar,“ segir hann. Hannes Hólmsteinn Gissurarson blandar sér einnig í umræðurnar og segir:
„Það getur vel verið, að þú hafir rétt fyrir þér um þetta allt, en það breytir því ekki, að Kári vann stórkostlegt afrek, sem seint verður fullþakkað. Afreksmenn þurfa ekki að vera mannkostamenn (fremur en rithöfundar þurfa að vera góðmenni). Og afrek unnu líka þeir einstaklingar (sem ég veit nöfnin á), sem lögðu nótt við dag að útvega Íslendingum nauðsynleg gögn, tæki og lyf, og kostuðu úr sjóðum fyrirtækja sinna og eigin vösum þotur fullar af þessu frá öðrum löndum.“
Persóna Kára er aukaatriði
Sara Óskarsson, varaþingmaður Pírata, segir að persóna Kára skipti litlu sem engu í þessu samhengi. „Umfjöllun um persónu hans í kjölfar þeirra upplýsinga sem að fram komu í viðtalinu er gjörsamlega “missing the point” á góðri íslensku,“ segir hún og bætir við að það sé með ólíkindum hvernig inntak mikilvægra málefna hverfur oft inn í smáborgaralegt eða illt umtal um persónur og gerendur í samfélaginu.
„Kári tilheyrir almenningi og ber nákvæmlega engin skylda til að dásama stjórnmálamenn né nokkur einasta skylda til að vera næsi gæinn. Hann er í bransanum að rannsaka og býðst til að skima í því skyni að hefta útbreiðslu farsóttar og bjarga mannslífum og aðstoða samlanda sína við að koma efnahag landsins vonandi aftur á réttan kjöl.
Hverjum er ekki slétt sama um orðbragðið og tjáningarstíl hans, eða persónu yfirleitt?
Er það til of mikils ætlast að menn haldi fókus á mikilvægu málefnin sem er verið að ræða en ekki missa sig í umfjöllun um karakter almenns borgara sem býður fram lífsnauðsynlega hjálp til þjóðarinnar og afnot af innviðum fyrirtækis síns?“