Tómas Biplab Mathiesen fæddist í Kolkata á Indlandi 24. ágúst 2000. Hann lést á Landspítalanum við Hringbraut 18. janúar 2020. Foreldrar hans eru Ingibjörg Harðardóttir og Ólafur Mathiesen. Systir hans er Alma Mathiesen nemi. Kærasta Tómasar er Margrét Kolka Hlöðversdóttir. Tómas var afar efnilegur tónlistarmaður og taktsmiður sem hafði nokkuð látið á sér kveða þrátt fyrir ungan aldur. Eitt verka hans var flutt í Hörpu og þá hljóðplandaði hann og samdi tónlist fyrir aðra listamenn. Greint er frá andláti Tómasar í Morgunblaðinu og Fréttablaðinu í dag.
Í viðtali við RÚV þegar hann varð fyrir valinu að fá verk sitt flutt í Hörpu greindi hann frá því að hann hefði byrjað aðeins 6 ára í Forskóla Tónskólans Do Re Mi og lærði síðan þar á píanó til 15 ára aldurs. Tómas sagði:
Sumarið 2015 byrjaði ég að semja tónlist í tölvunni (GarageBand og síðan LogicPro). Um verkið sem flutt var í Hörpu sagði Tómas:
Ég byrjaði á þessu verki, Titillaust, í febrúar síðastliðnum (2016). Ég notast mest við sömpl og innbyggð hljóð í forritun og hljóðfæri sem ég hef keypt af netinu og sett inn í forritið
Hugmyndin með verkinu var að ná fram hljómum sem eiga við þegar maður upplifir mikla hamingju og gleði, alsælu.“
Tómas stundaði nám við Menntaskólanum við Hamrahlíð. Tómas æfði sund og fótbolta með KR og síðar frjálsar íþróttir með ÍR. Hann þótti afar efnilegur frjálsíþróttamaður. Þá lærði hann á píanó í Tónskóla Do Re Mí. Síðustu ár hafði hann verið ötull við tónsmíðar, bæði fyrir sig og aðra. Hann var einkar hæfileikaríkur bæði við texta- og lagasmíð en hann gekk undir listamannsnafninu Dreyminn.
Tómasi er lýst sem einstaklega hógværum, hjartahlýjum og kurteisum dreng sem lét ekki mikið fara fyrir sér. Í minningargrein í Morgunblaðinu segir:
„Sérstaklega er það minnisstætt þegar Tómas var valinn til þátttöku sem ungt tónskáld í Upptakti árið 2016. Þar var tónverk hans flutt á glæsilegum tónleikum í Hörpu.
Lagasmíðar voru þá orðnar eitt helsta áhugamál hans og kom hann sér upp litlu „hljóðveri“ á Lynghaganum til að sinna því.“
Tómas var ættleiddur frá Indlandi og skrifar vinahópur sem samanstendur af sex fjölskyldum sem allar eru myndaðar kringum ættleidd börn, fædd á Indlandi og Kína, á árunum milli 1994 og 2003 minningargrein um Tómas. Í þeim hópi er alþingismaðurinn og rithöfundurinn Guðmundur Andri Thorsson. Þar segir:
„Við höfum haldið hópinn gegnum tíðina og hist reglulega og notið margvíslegra gefandi samvista, nú síðast í byrjun janúar í Sæviðarsundinu, þar sem Tómas hafði sterka nærveru, bjartur og fallegur og kíminn, og sat lengi og spjallaði við hitt unga fólkið.
Tómas var hrifinn frá okkur þegar hann stóð á þröskuldi fullorðinsáranna. Í honum mátti sjá barnið sem við þekktum og fyrirheitin um manninn sem hann gæti orðið.
Hann var sérlega vel gefinn ungur maður, skapandi og með mikla tónlistarhæfileika, efnilegur íþróttamaður, hjartahreinn, blíður, glaðlyndur, næmur, leitandi og djúpt þenkjandi, en líka með góðan og hlýjan húmor. Hann var tryggur vinur, góður stóri bróðir Ölmu og elskaður sonur Ingibjargar og Óla.
Við munum tónlist og sögur, leik, hlátur og samtöl. Við munum hann Tómas og munum aldrei gleyma honum. Blessuð sé minning Tómasar Biplabs.
Undir skrifa: Hrafnhildur og Árni, Guðrún og Gísli, Lína og Guðjón, Ingibjörg og Guðmundur Andri, Sigrún og Loftur Atli og fjölskyldur.“
Elva Traustadóttir umsjónarkennari Tómasar úr Hagaskóla skrifar:
Kynni mín af Tómasi og fólkinu hans voru afar ánægjuleg. Tómas átti umhyggjusama foreldra. Hann var einstakur ljúflingur, vel liðinn af samnemendum sínum, hafði fallega framkomu og lét sér annt um aðra.“
Steinn Jóhannsson rektor við Menntaskólann í Hamrahlíð segir:
„Fyrir okkur starfsfólki var Tómas dagfarsprúður nemandi sem kom vel fram við jafnt samnemendur sem starfsfólk skólans. Ég var svo lánsamur að geta fylgst með Tómasi á frjálsíþróttavellinum, en hann æfði frjálsar íþróttir um árabil með frjálsíþróttadeild ÍR. Hann lagði metnað í það sem hann tók sér fyrir hendur og lagði mikið á sig fyrir liðsheildina. Tómasi leið greinilega vel á hlaupabrautinni, en þar var hann svo sannarlega á heimavelli.
Við starfsfólk Menntaskólans við Hamrahlíð minnumst Tómasar með hlýju og eftirsjá.
Tómas spilaði til stuðnings: Ég á bara eitt líf
Tómas var tónlistarkonunni Sögu Nazari mikið innan handar. Bæði við lagasmíð og kom einnig fram með henni á tónleikum. Saga sagði Tómas einstaklega hæfileikaríkan í viðtali við Tímaritið SKE en þar var Tómasi einnig hrósað af tímaritinu fyrir sinn hluta í laginu. Saga segir á Facebook:
„Vorum með mörg plön saman í tónlist, drauma og framtíð. Er bara orðlaus. Hvíldu í friði elsku Tómas.“
Útför Tómasar var gerð frá Neskirkju í dag, 27. janúar 2020.
Tómas hélt úti rás á Soundcloud en þar eru fleiri lög eftir þennan efnilega tónlistarmann sem verður sárt saknað og kvaddi alltof snemma, en rásina má finna hér.