Þingmenn úti að aka ...

Þing­flokkur Fram­sóknar­flokksins stal senunni á kjör­dæma­dögum með því að aug­lýsa flakk sitt með stælingu á vegg­spjaldi kvik­myndarinnar Litt­le Miss Suns­hine sem fjallar um fólk sem hefur engin tök á sjálfu sér eða um­hverfi sínu.

Óháð því hvort út­spilið var út­pælt eða klassískur klaufa­skapur þá virkaði þetta þannig að and­stæðingarnir hljóta að í­huga þessa fjalla­baks­leið í næstu um­ferð. Kjördæmadögum lýkur í dag en þá notar þingfólk til þess að fara um kjördæmi sín og hitta að máli sveitarstjórnafólk, fulltrúa fyrirtækja og þá kjósendur sem hugsanlega hafa áhuga á að eiga við þá orðastað.

Framsóknarflokknum tókst að skyggja á hina þingflokkana sjö með mjög svo óvæntri og mögulega djúpsálfræðilegri auglýsingu sem mun ef að líkum lætur halda stjórnmála- og bókmenntafræðingum við efnið um ókomin ár.

Hvað var það minn kæri sem þú vildir okkur segja, þú frægi skrítni XB? Ráðgátur heilla og hinir flokkarnir geta stigið allt í botn í næstu umferð þar sem enginn skortur er á vegamyndum með marglaga boðskap, pólitískar skírskotanir og síðast en ekki síst áhrifarík plaköt.

Toxoplasmasýking gæti hafa gert Pluto og hyski hans jafn klikkað og raun ber sorglegt vitni í óbyggðaferðinni um fjölin sem hafa vakandi augu.

The Hills Have Eyes - Miðflokkurinn

Endurgerð hinnar sígildu hryllingsmyndar The Hills Have Eyes , eftir Wes Craven, getur ekki klikkað hjá flokki sem gæti talist endurgerð Framsóknarflokksins bara með aðeins djarfari leikstjóra. Vænisýki fjölskyldunnar sem er á leið til fyrirheitna landsins Kaliforníu er ekki ástæðulaus þar sem í ljós kemur að fjöllin hafa vakað og haft ill augu á henni þegar hópurinn ekur í flasið á snælduklikkuðum og stökkbreyttum mannætum með alvarlegan hegðunarvanda vegna toxoplasmasýkingar eftir ofneyslu stera og hormóna í innfluttu kjöti.

Into The Wild - VG

Á þessum hættuslóðum verða ýmsar uppákomur sem valda verulegum breytingum á flakkaranum.

Sönn saga um hóp sem segir skilið við allar hugmyndafræðilegar eignir sínar og heldur út í óvissuna í því sem reynist slíkt feigðarflan að örlagasagan er rakin í minningarleiftrum og endurliti í stórkostlegu landslagi. Á þessum hættuslóðum verða ýmsar uppákomur sem valda verulegum breytingum á flakkaranum sem bíður þess seint bætur þegar út úr þokunni líður kynjamynd með helblátt járn.

The Grapes of Wrath - Flokkur fólksins

Þrúgur reiðinnar spretta og dafna í frjóum jarðveginum sem Flokkur fólksins vökvar með tárum leiðtogans sem, eins og Tom Joad, má ekkert aumt sjá og snöggreiðist þegar hungrað fólk slæst um brauð og löggan lemur á mótmælendum. Einurðin í baráttunni jafnast líka á við hörkuna í öreigum Steinbecks sem héldu áfram þótt einhverjir heltust úr lestinni.

Smultronstället - Sjálfstæðisflokkurinn

Villt jarðarber og jafnvel humarhalar bragðast ósköp sænskt eitthvað þegar fortíðardraugur Bergmans horfir fýldur, þrjóskur og sjálfhverfur um öxl.

Þegar maður er orðinn svo gamall að helstu afrekin hafa fengið á sig þjóðsagnablæ og vöðvamassinn rýrnað úr 48% niður í rétt rúm 20% er ekki furða að bergmanískur drungi og þunglyndi hellist yfir þegar fornrar frægðar er leitað á órannsakanlegum vegum kjósenda. Villt jarðarber og jafnvel humarhalar bragðast ósköp sænskt eitthvað þegar fortíðardraugur Bergmans horfir fýldur, þrjóskur og sjálfhverfur um öxl.

Deliverance - Samfylkingin

Vel haldnir háskólaborgarar og hálaunalið sem nýtur alls þess besta sem höfuðborg lattélepjandi jafnaðarelítunnar hefur upp á að bjóða og gleymt því að hún stendur á ójafnlaunavottuðum og signum herðum verkalýðsins bregður sér af bæ. Rómantíkin snarrennur af kalli óbyggðanna þegar kratarnir sigla inn í sína verstu martröð: Fund með sauðsvörtum almúganum.

Pirates of the Caribbean - Píratar

Yarrr! Píratarnir voru brakandi ferskir og jafnvel flippaðir þegar þeir lögðu á pólitískt öldurótið en veltingur áhafnarinnar á strúktúrflötu þilfarinu fer að vekja álíka velgju og Johnny Depp þegar hann reynir að halda sjó eftir að hinar upprunalegu stjörnurnar eru stokknar frá borði. Áttavitinn góði sem vísaði alltaf í rétta átt og beint á rommið hringsnýst nú á milli siðareglna og mislitra sokka hásetans sem líður illa í skóm

Eurotrip - Viðreisn

Eftir erfið og dramatísk sambandsslit er upplagt að tékka aðeins á þýsku pennavinkonunni og draga vini sína með sér í óvissuferð um Evrópu í leit að ást, hamingju og tilgangi.