Páll Winkel, forstjóri Fangelsismálastofnunar, segir að allt að 90% af öllum föngum landsins glími við fíkniefnavandamál og að það sé alveg dagljóst að skipta þurfi um aðferð í baráttunni gegn fíkniefnum innan fangelsanna.
„Ég áætla að um 70-90% fanga glími við eiturlyfjafíknina. Í opnu fangelsunum eru menn komnir lengra í bata, en í lokuðu fangelsunum eru 90% fanga í virkri fíkn. Við erum að glíma við harðari og harðari efni og það er alveg dagljóst að það þarf að skipta um aðferð í þeirri baráttu,“ segir Páll í samtali við Morgunblaðið.
Páll segir að fíkniefnin komist inn í fangelsin með ættingjum og vinum fanga, ásamt því að koma með mat og öðrum vörum sem fangelsið fær. Ný fíkniefni ,eins og eiturlyfið sem gengur undir nafninu Spice, er lyktarlaust og er því erfitt að finna það í leit. Þá þurfi eingöngu eitt gramm af efninu til að búa til um eitt hundrað neysluskammta.
„Við höfum oft verið gagnrýnd fyrir það að fíkniefni komist inn í fangelsi. Það er nú þannig að fangar eiga rétt á að fá heimsóknir frá ættingjum og vinum. Svo þarf að senda mat og vörur inn í fangelsin. Við erum með fíkniefnahund og mjög öflugt starfsfólk sem leitar á öllum og í þessu öllu saman, en þegar komið er efni sem er lyktarlaust, og þar sem eitt gramm verður að hundrað skömmtum, þá geturðu ímyndað þér hvað það er erfitt að koma í veg fyrir svona sendingar. Við vitum hvaða fangar eru að dreifa fíkniefnum innan fangelsanna en efnin koma hins vegar ekki inn með heimsóknargestum þeirra. Þvert á móti eru það heimsóknargestir lágtsettra fanga sem eru þvingaðir til að koma með efni inn í fangelsin.“
