Fyrsta barn ársins var drengur sem fæddist á fæðingardeild Landspítalans klukkan 02:19 í nótt. Fjögur börn fæddust á Landspítalanum í nótt en annað barn ársins fæddist hins vegar í Björkinni klukkan 02:47 og var það stúlka.
Ekkert barn hefur enn fæðst á sjúkrahúsinu á Akranesi, Akureyri eða Selfossi á nýju ári. Ekkert barn fæddist þá á landinu í gærkvöldi.
Nýju lög varðandi greiðslur úr fæðingarorlofssjóði taka gildi í dag. Lögin fjalla einnig um lengingu fæðingarorlofs og fela í sér að samanlagður réttur foreldra barna, sem fæðast, eru ættleidd eða tekin í varanlegt fóstur frá og með 1. janúar 2020, lengist um einn mánuð eða úr níu mánuðum í tíu mánuði.
Nýbakaðir foreldrar barnanna fá því tíu mánaða fæðingarorlof. Fæðingarorlofið mun svo lengjast aftur 1. janúar 2021 um tvo mánuði og fer þá úr tíu mánuðum í tólf.
Greiðslurnar úr fæðingarorlofssjóði hækkuðu þá í dag. Lágmarksgreiðsla fyrir 25-49% starf hækkar úr 128.357 krónum í 132.850 krónur á meðan lágmarksgreiðsla fyrir 50-100% starf hækkar úr 177.893 krónum í 184.119 krónur.
Fæðingarstyrkur til foreldra utan vinnumarkaðar eða í minna en 25% starfi hækkar úr 77.624 krónum í 80.341 krónur og styrkur til foreldra í fullu námi hækkar úr 177.893 krónum í 184.119 krónur.
