Sigmundur Davíð Gunnlaugsson, formaður Miðflokksins, sagði í Kastljósi í kvöld að hann efist um hæfi allra ráðherra ríkisstjórnarinnar. Þetta sagði hann þegar hann var spurður út í hæfi Kristjáns Þórs Júlíussonar, sjávarútvegsráðherra, í ljósi stöðu hans gagnvart Samherja.
„Ég dreg hæfi hans í efa og allra ráðherra ríkisstjórnarinnar, í öllum málum,“ sagði Sigmundur en dró svo örlítið í land. „Eða, ekki öllum alveg, en flestum. Í sjávarútvegsmálum og landbúnaðarmálum tel ég að það væri betra að hafa annan ráðherra, og það sama á reyndar við um aðra málaflokka líka.“
Þegar Jóhanna Vigdís Hjaltadóttir, þáttastjórnandi, spurði hann frekar út í málið og hans skoðun á hæfi Kristjáns Þórs vegna Samherjamála, lagði Sigmundur á það áherslu að aðalatriðið væri hvaða ákvarðanir ráðherrar taka.
„Ef ráðherrar þekkja til í ákveðnum málaflokki þá þekkja þeir einhverja sem tengjast þeim málaflokkum. Aðalatriðið þar er að mínu mati hvernig þeir halda á þeim málaflokkum og hvað ákvarðanir þeir taka. Mér finnst þessi sjávarútvegs- og landbúnaðarráðherra ekki hafa verið að taka í öllum tilvikum réttar ákvarðanir og kannski enn frekar í landbúnaðarmálunum heldur en í sjávarútvegsmálunum þó það sama megi segja um aðra ráðherra líka.“
