Rithöfundurinn knái, Andri Snær Magnason gerir sér lítið fyrir og toppar glæpasagnakonunginn Arnald Indriðason í árssölunni í stærstu bóksölukeðju landsins, Pennanum Eymundsson.
Þetta eru á meðal helstu tíðinda þegar bóksölulisti síðasta árs er tekin saman af starfsmönnum keðjunnar, sem selur bækur um allt land - og er í rauninni eina bóksalan sem enn lætur eitthvað að sér kveða á landsvísu.
Um tímann og vatnið eftir Andra Snæ Magnason hefur verið gríðarlega vinsæl frá því hún kom út í byrjun október, að því er fram kemur í tilkynningu frá bóksölukeðjunni í dag, en þar segir að hún hafi verið mest selda bókin í verslunum Pennans Eymundsson árið 2019.
Bók Andra Snæs fékk almennt mikið lof í umsögnum á síðasta ári, meðal annars 5 stjörnur hjá Birni Bjarnasyni, fyrrverandi ráðherra í Morgunblaðinu, sem vakti athygli, en raunar vakti enn meiri athygli að hún var ekki tilnefnd til íslensku bókmenntaverðlaunanna, sem mörgum bókmenntamógúlnum fannst stappa nærri bókablindu.
Árslistinn lítur annars svona út hjá Pennanum Eymundsson:
1. sæti | Um tímann og vatnið | Andri Snær Magnason |
2.sæti | Tregasteinn | Arnaldur Indriðason |
3.sæti | Hvítidauði | Ragnar Jónasson |
4.sæti | Innflytjandinn | Ólafur Jóhann Ólafsson |
5.sæti | Gullbúrið | Camilla Läckberg |
6.sæti | Þögn | Yrsa Sigurðardóttir |
7.sæti | Independent People | Halldór Laxness |
8.sæti | Þinn eigin tölvuleikur | Ævar Þór Benediktsson |
9.sæti | Iceland in a Bag | Ýmsir höfundar |
10.sæti | Sumareldhús Flóru | Jenny Colgan |