„Það er óþolandi að ætíð séu heimilin látin reka á reiðanum,“ segir Vilhjálmur Birgisson, formaður Verkalýðsfélags Akraness og fyrrverandi varaforseti ASÍ, í pistli á Facebook-síðu sinni
Hagstofan greindi frá því í gær að síðastliðna tólf mánuði hefði verðbólga hækkað um 4,3 prósent. Bein afleiðing af hærri verðbólgu er sú að verðtryggðar skuldir hækka.
Vilhjálmur bendir á að aðgerðapakkar vegna COVID-19 til stuðnings fyrirtækjum hafi til þessa kostað skattgreiðendur um 80 milljarða króna. Hann gagnrýnir ekki að fyrirtækjum sé komið til aðstoðar, meðal annars til að halda ráðningarsambandi við starfsfólk, en veltir fyrir sér hvort nóg hafi verið gert fyrir heimili landsins.
„Ég vil rifja upp að í upphafi á COVID faraldrinum í fyrra barðist ég sem fyrrverandi fyrsti varaforseti ASÍ fyrir því að sett yrði þak á neysluvísitöluna tímabundið til að verja heimilin fyrir hugsanlegu verðbólguskoti vegna snarminnkandi gjaldeyrisinnstreymis vegna ferðamanna sem myndi hafa áhrif á gengi íslensku krónunnar.“
Krafa Vilhjálms og Ragnars Þór Ingólfssonar, formanns VR, byggðist meðal annars á því að setja þak á neysluvísitöluna við neðri vikmörk á verðbólgumarkmiði Seðlabankans sem er 2,5 prósent.
„Þetta fékk ekki hljómgrunn hjá stjórnvöldum að verja verðtryggðar skuldir heimilanna. Núna tæpu ári eftir að ég lagði þessa hugmynd fram hefur verðbólgan farið úr 2,8% í 4,3% sem er hækkun um 1,5%.
Vilhjálmur segir að ef stjórnvöld hefðu tekið þátt í að verja heimilin þá væru verðtryggðar skuldir heimilanna 32 milljörðum minni en þær urðu.
„Það er óþolandi að ætíð séu heimilin látin reka á reiðanum þegar kemur að því að fá stuðning frá ríkisvaldinu en þegar kemur að því að verja fjármagnsauðvaldið og fyrirtækin þá stendur ekki á neyðarfundum stjórnvanda, skítt með heimilin þeim má fórna enn og aftur á blóðugu altari verðtryggingarinnar.“