Starfsmaður Hagkaups í Spönginni greindist jákvæður fyrir Covid-19 í gær, mánudag. Til að gæta fyllstu varúðar voru allir starfsmenn verslunarinnar sem voru í samskiptum við umræddan starfsmann sendir í sóttkví.
Þetta kemur fram í tilkynningu sem Hagkaup birti á Facebook-síðu íbúahóps Grafarvogsbúa. Þar segir að ákvörðunin um að senda starfsmenn í sóttkví hafi verið gerð í góðu samráði við rakningarteymi almannavarna og gengið hafi verið lengra en almennar sóttvarnarreglur segja til um.
„Athygli er vakin á því að umræddur starfsmaður var ekki í nánu samneyti við viðskiptavini verslunarinnar.“
Þá segir í tilkynningunni að verslunin hafi verið sótthreinsuð hátt og lágt í nótt og opnuð á ný í morgun.
„Starfsfólk úr öðrum verslunum okkar mun því standa vaktina og verður starfsemin því að mestu óbreytt næstu daga. Við munum því taka vel á móti ykkur í Spönginni. Við viljum þakka rakningarteyminu fyrir gott samstarf og snör viðbrögð og sömuleiðis okkar frábæra starfsfólki fyrir sýndan skilning.“