Prófkjöri Sjálfstæðismanna í Suðvesturkjördæmi lauk nú klukkan 18 í dag en prófkjörið hófst síðastliðinn fimmtudag. Alls voru um 4700 manns sem greiddu atkvæði í prófkjörinu í ár en tólf frambjóðendur sóttust þar eftir sex efstu sætunum á lista Sjálfstæðisflokksins fyrir komandi Alþingiskosningar.
Fyrstu tölur úr prófkjörinu liggja nú fyrir og líkt og við var að búast er Bjarni Benediktsson, formaður flokksins og efnahags- og fjármálaráðherra efst á lista, með 1169 atkvæði í fyrsta sæti af þeim 1419 atkvæðum sem þegar hafa verið talin.
Á eftir Bjarna koma þrír aðrir þingmenn Sjálfstæðisflokksins, Jón Gunnarsson í öðru sæti, Bryndís Haraldsdóttir í þriðja, og Óli Björn Kárason í því fjórða.
Athygli vekur að nýliðarnir Arnar Þór Jónsson og Sigþrúður Ármann virðast ekki vera að ná þeim árangri sem að var stefnt en þau skipa fimmta og sjötta sætið á listanum.
Í heildina kusu um 4700 manns í prófkjörinu og er von á næstu tölum klukkan 21:00 í kvöld.
Fyrstu tölur í Suðvesturkjördæmi:
- Í 1. sæti með 1169 atkvæði í 1 sæti er Bjarni Benediktsson
- Í 2. sæti með 371 atkvæði í 1-2 sæti er Jón Gunnarsson
- Í 3. sæti með 474 atkvæði í 1-3 sæti er Bryndís Haraldsdóttir
- Í 4. sæti með 587 atkvæði í 1-4 sæti er Óli Björn Kárason
- Í 5. sæti með 696 atkvæði í 1-5 sæti er Arnar Þór Jónsson
- Í 6. sæti með 787 atkvæði í 1-6 sæti er Sigþrúður Ármann