Donald Trump Bandaríkjaforseti segir að ríkisstjórn hans hafi unnið „ótrúlegt“ starf í baráttunni gegn COVID-19. Þetta segir Trump í nýju viðtali sem sýnt var hjá HBO í gærkvöldi. Hvergi í heiminum hafa fleiri smit greinst en í Bandaríkjunum og nálgast þau nú fimm milljónir. Tæplega 160 þúsund hafa látist.
Þrátt fyrir þessa staðreynd segist Trump stoltur af vinnu bandarískra yfirvalda í baráttunni gegn veirunni.
„Þetta hefur aldrei gerst áður. Það sem gerðist 1917 var ólíkt þessu sem nú er í gangi, það var flensa. Ef þú horfir á falsfréttirnar á sjónvarpsstöðvunum sérðu að það fjallar enginn um það, en það eru 188 aðrar þjóðir sem eru einnig í vanda. Sum þeirra eru hlutfallslega í miklu verri stöðu en við.“
Jonathan Swan, sá er tók viðtalið, spurði Trump út í það hvaða lönd það væru sem væru í verri stöðu en Bandaríkin. Dró Trump fram pappíra sem sýndu nokkuð góða stöðu Bandaríkjanna í samanburði við önnur lönd um hlutfall milli dauðsfalla og greindra tilfella.
Swan benti forsetanum á hvort ekki væri rétt að bera saman fjölda tilfella miðað við fólksfjölda. „Þar er staða Bandaríkjanna ekki góð. Miklu verri en í Þýskalandi, Suður-Kóreu.“
Trump sagðist ekki vera sammála þeim samanburði.
Guardian fjallar um efni viðtalsins og bendir á að fjórðungur allra staðfestra kórónuveirutilfella á heimsvísu hafi komið upp í Bandaríkjunum.
Viðtalið má sjá hér að neðan en kaflinn sem fjallað er um hér að ofan byrjar eftir um það bil 13 mínútur.
