„Þar sem Alþingi er ekki að vinna á fullum afköstum væri þá ekki eðlilegt að laun þessa fólks væru lækkuð í hlutfalli við vinnuframlag og þessir einstaklingar myndu fá greitt samkvæmt tillögum ríkisstjórnarinnar um greiðslur atvinnuleysisbóta?“
Þetta hefur fjölmiðlamaðurinn Eiríkur Jónsson, sem heldur úti vefnum eirikurjonsson.is, eftir Tómasi Andrési Tómassyni, veitingamanni á Hamborgarabúllunni, betur þekktum undir nafninu Tommi á Búllunni.
Eins og alþjóð veit hefur kórónuveiran sem veldur COVID-19 haft mikil áhrif hér á landi, meðal annars á starfsmenn þingsins og þingmenn. Þingmenn í sóttkví geta ekki tekið þátt í starfsemi þingsins og í síðustu viku var ákveðið að taka starfsáætlun þingsins úr sambandi til og með 20. apríl. Á þeim tíma verða eingöngu boðaðir þingfundir til að takast á við brýn mál sem tengjast COVID-19 heimsfaraldrinum.
Tommi bendir á að 63 þingmenn séu á þinginu, þar á meðal 10 ráðherrar með allt að 20 aðstoðarmenn. Auk þess tengist fullt af fólki þinginu og stjórn ráðuneytanna. Hann veltir því fyrir sér hvort ekki væri ráð að lækka launin nú þegar starfsemi þingsins er ekki á fullum afköstum.
„Þá myndi hver og einn taka þátt i þessari krísu sem þjóðin er að ganga í gegnum og taka á sig launalækkun. Það myndi undirstrika það að við eru öll saman í þessu.“
Hann veltir einnig fyrir sér hvort ekki væri eðlilegt að til dæmis heilbrigðisstarfsfólk, sem er tilbúið að taka áhættu með heilsu sína til að halda uppi heilbrigðiskerfinu, fái greiddar álagsgreiðslur í samræmi við álagið sem er um þessar mundir.
Sjá Eirikurjonsson.is