Ítarlega er fjallað um hneykslismálin sem tengjast ákveðnum leikmönnum íslenska karlalandsliðsins sem og Knattspyrnusambandi Íslands í ítarlegri fréttaskýringu á vefmiðlinum The Athletic í dag.
Fyrirsögn greinarinnar segir mikið: Víkingaklappið hefur verið eyðilagt að eilífu – Kynferðislegt ofbeldi, hneykslismál sem skekur íslenska knattspyrnu.
Í fréttaskýringunni er meðal annars rætt við Pétur Marteinsson, fyrrverandi landsliðsmann: ,,Við vitum ekki á þessari stundu hvernig þessir leikmenn og sambandið mun taka á þessu að lokum. Ég tel að það sé enn möguleiki fyrir okkur að komast í gegnum þetta með góðum árangri, ef hægt er að orða það þannig. En til styttri tíma litið hefur þetta að minnsta kosti eyðilagt orðspor okkar og arfleifð liðsins til styttri tíma.“
Einnig er talað við Þórhildi Gyðu Arnarsdóttur, sem steig fram, sagði sína sögu og greindi frá ofbeldi landsliðsmanns í knattspyrnu gegn sér. Hún segist hafa stigið fram vegna þess að Guðni, þáverandi formaður KSÍ, hafi logið í viðtali sem tekið var við hann í Kastljósi á RÚV.
,,Ég steig fram því hann laug, ég steig ekki fram til þess að tala um ofbeldið sem ég hafði gengið í gegnum,“ er meðal þess sem Þórhildur Gyða Arnarsdóttir segir í viðtali hjá The Athletic.
Vanda Sigurgeirsdóttir, tók við sem formaður KSÍ og þarf að leiða sambandið inn í nýja tíma og í gegnum ólgusjó. Hún segist ekki vita hvort að rætur vandamálsins liggi dýpra og sé innviklað í menningu íslenska landsliðsins. ,,Ég veit það ekki, ég var ekki á staðnum á þessum tíma. Þetta eru nokkur mál og eitt er víst, við þurfum að breyta menningunni.“
Bæði Aron Einar Gunnarsson og Kolbeinn Sigþórsson, hafa báðir neitað sök í sínum málum. Fimm dögum eftir að Þórhildur Gyða steig fram og sagðist hafa verið beitt ofbeldi af hálfu landsliðsmanns sendi Kolbeinn frá sér yfirlýsingu þar sem hann neitaði sök, hann hafði hins vegar náð sáttum utan dómssals við Þórhildi og vinkonu hennar sem hafði einnig kvartað undan honum.
Aron Einar er sakaður um að hafa árið 2010 beitt konu kynferðislegu ofbeldi í landsliðsferð ásamt öðrum fyrrverandi landsliðsmanni, Eggerti Gunnþóri Jónssyni. Þeir neita báðir sök.
Ævar Pálmi Pálmason, yfirmaður kynferðisbrotadeildar lögreglu, segir í samtali við The Athletic að málið sem tengist tveimur landsliðsmönnum árið 2010 hefur verið opnað að nýju og Ævar segir lögregluna hafa góða ástæðu fyrir því: ,, „Ég get staðfest að við höfum opnað mál sem kom upp árið 2010. Við erum að opna málið, við höfum fengið nýjar upplýsingar. Við þurfum góðar ástæður til að opna mál og við eru með góðar ástæður. Ný gögn hafa komið fram, við höfum tekið viðtöl við fjölda fólks.“
