Rúna Hauksdóttir Hvannberg, forstjóri Lyfjastofnunar, segir orðróma um aukaverkanir í kjölfar bólusetninga gegn Covid-19 vera ósanna í samtali við Fréttablaðið. Hún gagnrýnir auglýsingu sem birt var í Morgunblaðinu í dag með lista um meint dæmi um aukaverkanir.
Auglýsingin var keypt af Bjuti ehf., sem er í eigu Vilborgar Bjarkar Hjaltested. Í auglýsingunni var fólk hvatt til að tilkynna aukaverkanir vegna bólusetninga gegn Covid-19 til Lyfjastofnunar. Þá voru sett fram meint dæmi um aukaverkanir vegna bólusetninga á borð við lömun, blindu, heilablóðfall, andlát og fleira.
„Það er tekinn fram listi og settur fram líkt og þar sé um að ræða þekktar aukaverkanir,“ segir Rúna í samtali við Fréttablaðið. Tilkynningar sem berast Lyfjastofnun séu bara um mögulega aukaverkanir og aldrei hafi borist tilkynning um lömun eða blindni.
Ósannur orðrómur
Þá kemur fram að orðrómur hafi verið á kreiki um heilsuhrausta stúlku sem hafi blindast, lamast og fengið yfir 20 blóðtappa í kjölfar bólusetningar með AstraZeneca. Sá orðrómur standist þó enga skoðun.
Rúna staðfestir að enginn hafi blindast eða lamast í kjölfar bólusetningar og að þær 14 tilkynningar sem borist hafa um blóðtappa hafi verið aðskildar. „Við höfum ekki orðið vör við svona orðróma nýlega enda erum við líklega ekki á þeim stöðum á samfélagsmiðlum að við höfum upplýsingar um slíkt,“ segir Rúna.
„Mér finnst að ef fólk er að birta auglýsingar þá á það að birta þær undir nafni,“ segir Rúna. „Það er villandi að láta líta út eins og þetta komi frá heilbrigðisyfirvöldum.“
