Þráinn Bertelsson, rithöfundur og fyrrverandi Alþingismaður, segir að það sé langt síðan heilsubransinn gafst upp á samúð og sneri sér að því að græða peninga.
Þráinn vekur athygli á verðinu á andlitsgrímum á Facebook-síðu sinni og þykir honum nóg um. Eins og kunnugt er þarf nú að bera andlitsgrímur þegar ekki er hægt að tryggja tveggja metra nálægðartakmörk. Á þetta til dæmis við í almenningssamgöngum svo dæmi sé tekið.
Þráinn bendir á dæmi um verð á svokölluðum FFP2 grímum í tiltekinni heilsuvöruverslun. Þar er hægt að fá tvær einnota grímur til að hylja öndunarfærin fyrir 2.450 krónur. Stykkið er því á 1.225 krónur.
„Þannig að tvær á dag á hvern fjölskyldumeðlim kosta ekki nema 73.500 kr. á mánuði. Ef maður notar þrjár á dag þá rétt losar það hundraðþúsundkallinn. Og ársbirgðir fyrir einn kosta þá ekki nema rúma milljón. Fyrir stórar fjölskyldur þar sem allir fjölskyldumeðlimir vilja lifa af pestina verður þetta hins vegar soldið dýrara.“
Svo virðist vera sem verðið á umræddum FFP2 grímum, sem teljast mjög öruggar, sé víða í kringum þúsund krónurnar stykkið.
Það vakti talsverða athygli fyrir helgi þegar greint var frá skyndilegri verðhækkun á andlitsgrímum í verslun Lyfja og heilsu. Á fimmtudag hafi viðskiptavinur verslunarinnar í Firðinum greitt 210 krónur fyrir andlitsgrímu klukkan 13:09 en 23 mínútum síðar hafi verðið verið komið upp í 498 krónur. Innkaupastjóri Lyfja og heilsu hafnaði því að verðið hafi verið hækkað heldur hafi verið um að ræða tvær ólíkar vörur. Sú ódýrari hafi verið fljót að seljast upp.
Facebook-færsla Þráins vakti nokkra athygli og í umræðum var bent á að víða væri grímum úthlutað ókeypis. Þráinn sagðist ekki hafa nokkurn skapaðan hlut á móti því að borga fyrir það sem hann kaupir. „En mér finnst fáránlegt að þurfa að borga okurverð fyrir eitthvað sem mér er skipað að kaupa,“ segir hann.
Þráinn segir enn fremur að ríkið ætti að afhenda þeim grímur sem þurfa á að halda en geta ekki nálgast þær upp á eigin spýtur af einhverjum ástæðum.
„Sjálfbjarga fólk á að sjá um sig sjálft, en þegar fyrirmæli koma frá ríkinu um að öllum beri að nota grímu á ríkið að sjá til þess að siðblindingjar grípi ekki tækifærið til að okra á fólki. Þannig lít ég nú á málin.“