Þórólfur Guðnason, sóttvarnarlæknir, segir það ekki útilokað að apabóla berist hingað til lands, en fyrsta tilfelli hennar greindist í Svíþjóð í gær.
Almenningur og heilbrigðisstarfsmenn eru beðnir um að hafa greininguna á sjúkdómnum í huga, sérstaklega hjá þeim sem hafa verið á ferð erlendis og eru með einkennandi útbrot.
Nokkur tilfelli af þessum sjaldgæfa sjúkdómi hafa greinst í Bandaríkjunum og víðs vegar í Evrópu, meðal annars á Spáni, Ítalíu, Belgíu og Portúgal. Í Bretlandi hefur fjöldi staðfestra tilfella tvöfaldast á mjög skömmum tíma, en þarlend yfirvöld tilkynntu í morgun að ellefu ný tilfelli af veirunni hefðu fundist. Nú hafa alls tuttugu tilfelli verið staðfest þar í landi. Í morgun ákvað svo ríkisstjórn Svíþjóðar að skilgreina apabólu sem ógn við almannaheill.
Í tilkynningu frá Þórólfi Guðnasyni sóttvarnarlækni kemur fram að apabóla orsakist af veiru sem er náskyld bólusóttarveiru og sé einkum þekkt hjá dýrum, en einnig mönnum. Smit frá dýrum til manna sé sjaldgæf og sömuleiðis smit milli manna.
„Sjúkdómurinn hefur til þessa aðallega verið greindur í Mið- og Vestur-Afríku, en er nú að greinast í Evrópu hjá einstaklingum sem sumir hverjir hafi verið í Afríku en aðrir ekki. Smit berst í fólk með náinni snertingu, ýmist sem dropasmit með hósta/hnerra eða sem snertismit með vessa sem myndast í útbrotum á húð. Sjúkdómsmyndin getur líkst öðrum sjúkdómum eins og hlaupabólu eða sárasótt, en greining er staðfest með rannsókn á vessa úr bólunum,“ segir í tilkynningu.
