Þórólfur Guðnason, sóttvarnalæknir, segist telja Kára Stefánsson vega ómaklega að sér með þeim orðum sínum að hann telji að skilaboð sóttvarnaryfirvalda hafi valdið því að fólk hafi byrjað að slaka á í sóttvörnum.
Þetta kemur fram í hádegisfréttum Bylgjunnar í dag. Kári sagði í gær í kvöldfréttum Stöðvar 2 að hann teldi að skilaboðin hafi valdið því að fólk hafi farið að slaka á.
Þórólfur segir þetta ómaklega að sér vegið. „Það var ekki alveg það sem ég bjóst við,“ sagði Þórólfur. Margt hafi áhrif, ekki bara það sem einhver einn eða annar segir eða segir ekki.
„Ég hef alltaf sagt að við þurfum að fara mjög varlega,“ segir Þórólfur. „Við vitum að þessi tilmæli og reglugerðir sem eru í gildi taka enda og það þarf eitthvað nýtt að taka við. Ég hef aldrei sagt að það verði slakað á. Ég hef sagt að það sé allt til skoðunar og auðvitað veit maður ekkert hvernig væntingar fólks eru.“
Þórólfur segir að mikilvægt sé að allir séu heiðarlegir í því sem þeir séu að gera.
„Bestu sóttvarnaaðgerðirnar væru að loka alla inni í marga mánuði þar til þetta væri allt saman búið. Ég er ekki viss um að það myndi ganga. Það hljóta allir að sjá að þú nærð ekki samvinnu við fólk með því móti.“