„Skrapp til Þingvalla í gær og varð hreinlega sorgmæddur að sjá hvernig búið er að fara með þennan fallega og merkilega stað,“ segir Þór Saari, fyrrverandi þingmaður, í pistli á Facebook-síðu sinni.
Þór er mjög ósáttur með stöðu mála á Þingvöllum eins og glögglega má lesa í pistli hans. Bendir hann á að algengasta orðið sem hann sá á öllu svæðinu hafi verið enska orðið „pay“.
„Hakið, þar sem áður fyrr var svo fallegt útsýni er orðið að gríðarstóru malbikuðu bílastæði og stór hluti svæðisins er þakinn stórum byggingum sem hýsa klósett og stöðumæla. Það voru fleiri WC merki á Hakinu en upplýsingaskilti. Hryllingurinn sem heitir útsýnispallur er allt of stór og búið er að byggja forljóta brú niður í Almannagjá og eyðileggja merkilegustu og fallegustu þjóðleið landsins. Þar og á völlunum fyrir neðan var líka allt útbíað í skiltum um að bannað væri að ganga á grasinu og svo rukkunarskiltum á ensku og íslensku. Eftir stutta samantekt var niðurstaðan að algengasta orðið sem ég sá á öllu svæðinu var enska orðið „Pay“.“
Þór Saari segir að ábyrgðin liggi hjá stjórnmálamönnum þjóðarinnar og þeir megi skammast sín.
„Þvílík skömm og heimska að fara svona með þennan stað sem er líklega sá merkilegasti á landinu hvað varðar sögu, menningu og stjórnmál og þau sem bera ábyrgðina á því að leyfa þessu að gerast, Þingvallanefnd (alþingismenn), þjóðgarðsvörðurinn (embættismaður) og svo Alþingi allt, mega skammast sín út í ystu myrkur.“
Þór lætur nokkuð stór orð falla um ferðamannaiðnaðinn og segir að staðan á Þingvöllum – og eflaust víðar – sé drifin áfram af peningalegum hagsmunum. Einhvern veginn hafi honum tekist að komast upp með að ráða ferðinni og leggja allt landið undir starfsemi sína, „án endurgjalds“ eins og hann segir.
„Sjoppan Þingvellir“ er sorgleg staðreynd og þótt staðurinn heiti formlega þjóðgarður er það í dag bara yfirskin til að selja fleiri ferðamönnum landið. Iss!“
Þór kveðst vona að eftir COVID-19 faraldurinn muni stjórnvöld setja fram áætlun um takmarkanir á fjölda ferðamanna í þjóðgörðum og öðrum náttúruperlum landsins. Þá verði gripið til einhverskonar aðgerða á Þingvöllum.
„Vesalings Ísland að þurfa að búa með þessari stjórnmálastétt. Eina myndin sem ég náði af óbrenglaðri náttúru var 30 kílómetrum norðan þjóðgarðsins af Skjaldbreið. Það formfagra fjall bjargaði deginum,“ segir Þór en myndirnar sem hann birti má sjá í færslunni hér að neðan.
Þess má að lokum geta að Þór virðist hafa látið tilmæli sóttvarnarlæknis og almannavarnadeildar ríkislögreglustjóra sem vind um eyru þjóta. Voru íbúar höfuðborgarsvæðisins hvattir til að halda sig innan svæðisins næstu tvær til þrjár vikurnar hið minnsta.
Skrapp til Þingvalla í gær og varð hreinlega sorgmæddur að sjá hvernig búið er að fara með þennan fallega og merkilega...
Posted by Þór Saari on Sunnudagur, 18. október 2020