„Það er hreinlega frekar ömurlegt að hugsa til þess að þroskastig íslensks atvinnulífs sé ekki meira en svo að það haldi að fólk með sérfræðiþekkingu sé óhæft vegna þess að það hafi komið að stjórnmálastarfi,“ segir Þór Saari, fyrrverandi þingmaður, í pistli á Facebook-síðu sinni.
Þar vísar Þór í nýja bók Ólínu Þorvarðardóttur, fyrrverandi kollega af þinginu, Spegill fyrir Skuggabaldur, en í henni er meðal annars fjallað um þær áskoranir sem mæta á vinnumarkaði þeim sem hafa tekið þátt í pólitísku starfi. Þór var þingmaður Suðvesturkjördæmis kjörtímabilið 2009 til 2013 og þekkir hann þessar áskoranir vel sem Ólína lýsir í bók sinni.
„Eins ömurlega og það hljómar þá gengur fjöldi fólks um göturnar atvinnulaust, sumt til lengri tíma, vegna þess að það hefur tekið þátt í stjórnmálum og viðrað stjórnmálaskoðanir eða aðrar skoðanir sem eru ekki þóknanlegar krónprinsum atvinnulífsins. Margt af þessu fólki er mjög hæft, með mikla og góða starfsreynslu og menntun, en einhverra hluta vegna fær það hvergi vinnu,“ segir Þór í færslu sinni.
Þór er vel menntaður og líklega með betri menntun að bakinu en meðal-Íslendingurinn. Hann er B.Sc. próf í markaðsfræði frá University of South Carolina, MA-próf í hagfræði frá New York University og kennararéttindi fyrir framhaldsskólastig. Þrátt fyrir góða menntun og reynslu hefur Þór komið að lokuðum dyrum á vinnumarkaði eftir að setu hans á Alþingi lauk.
„Það sem Ólína varpar ljósi á er mikil meinsemd því afleiðingin er ekki bara að fólk veigrar sér við stjórnmálaþátttöku og umræðu, heldur einnig að tap samfélagsins er umtalsvert vegna þeirrar vannýttu auðlindar sem þetta fólk er. Að vísu þarf ekki að horfa lengi til framgöngu Samtaka atvinnulífsins og dóttursamtaka þeirra til að sjá að það er ekki beint hugjón um betra samfélag sem drífur þau áfram heldur miklu frekar draumurinn um fasískan ríkiskapítalisma, en þetta er samt óeðlilegt. Þetta snýst nefnilega um miklu meira en það hvernig efnahagskerfi við viljum búa við, þetta snýst um að frjálsar manneskjur geti búið í frjálsu samfélagi, geti haft skoðanafrelsi og tjáð þær skoðanir opinberlega án þess að gerð sé aðför að afkomu þess. Þetta býr líka til og viðheldur hinni alræmdu „klíkuvæðingu“ starfa þar sem stjórnmálamenn „leggja inn“ hverjir hjá öðrum upp á framtíðina að gera,“ rekur Þór í færslu sinni.
Hann segir að hann sé sjálfur einn af þessu fólki sem fjallað er um í bók Ólínu, en hann hefur ekki fengið hefðbundna launavinnu síðan kjörtímabilinu á þingi lauk árið 2013.
„Þegar starfi mínu á Alþingi lauk átti ég fundi með framkvæmdastjórum þriggja stærstu ráðningastofa landsins þar sem ég kynnti mig, lagði fram starfsferilsskrána og fór yfir starfsferilinn með þeim. Það sem var athyglisvert var að það fyrsta sem þeir sögðu og þeir svöruðu allir nánast því hinu sama: „Þór það er svo skrýtið en hér á landi er almennt erfitt fyrir fólk sem hefur verið virkt í stjórnmálum að fá vinnu er starfi þeirra í stjórnmálum lýkur.“
Honum var bent á að þessu væri einmitt öfugt farið í nágrannalöndunum þar sem reynsla af þingmennsku þykir merkileg og góð reynsla að búa að.
„Þetta voru orð að sönnu, því síðan þá hef ég fengið um tvö hundruð afsvör við umsóknum um starf. Í mörgum tilfellum hef ég augljóslega verið hæfasti umsækjandinn og tafsið, tuðið og blaðrið sem ég hef fengið að heyra, sérstaklega frá opinberum stofnunum, þegar ég hef óskað eftir rökstuðningi, hefur hreinlega verið með ólíkindum. Einna duglegust er þó Hagstofan sem hefur verið sérstaklega iðin við það undanfarin ár að auglýsa stöður og boða fólk í viðtöl, en ákveða svo að „ráða ekki í stöðuna að sinni“,“ segir Þór.
Hann virðist ekki vera einn í þessum sporum því hann segist hafa hitt marga fyrrverandi kollega af þinginu og staðan hjá mörgum þeirra sé sú sama og hjá honum. Þeir hafi ekki enn fengið neina fasta launavinnu og, sem fyrr segir, hefur hann sjálfur fengið 200 nei.
„Skuggabaldrar þeir sem Ólína varpar ljósi á eru ekki bara einhverjar gamlar leifar kunningja- og klíkusamfélags sem nútíma stjórnunarhættir alþjóðasamfélagsins hefur sigrað, heldur eru þeir enn að og nýjasta og eitt afkáralegast dæmið er þegar að sjálft fjármálaráðuneytið kom í veg fyrir að virtur prófessor við Háskóla Íslands til áratuga, fengi ritstjórnarstöðu við samnorrænt fræðirit um fjármál hins opinbera,“ segir Þór sem endar færslu sína á þessum orðum:
„Dæmin sem Ólína telur upp eru mörg og óhugnanleg og lýsa kerfi sem er algerlega siðlaust og mannfjandsamlegt. Kerfi sem mun áfram viðhalda sjálfu sér verði ekkert að gert og svo það fylgi með þá munu Fjórflokkurinn og SA svo sannarlega ekki gera neitt í málinu, ef þú lesandi góður ert að velta fyrir þér hvað þarf að gera.“
Ólína Þorvarðardóttir kemur hér fram með bók sem sannarlega tekur á mjög mikilvægu, en jafnframt viðkvæmu og erfiðu...
Posted by Þór Saari on Föstudagur, 9. október 2020