Anna Sigríður Jökulsdóttir, sálfræðingur hjá Kvíðameðferðarstöðinni segir að það sé mikilvægt fyrir foreldra að bregðast við í samræmi við það sem sé að eiga sér stað þegar jarðskjálftar ríða yfir, barna þeirra vegna.
Þetta kom fram í Reykjavík síðdegis í dag þar sem Anna var til viðtals vegna þeirrar jarðskjálftahrinu sem dunið hefur yfir Reykjanesskaga. Hún segir óttatilfinningu afar eðlileg viðbrögð hjá öllum við þær aðstæður sem nú eru uppi.
„Það er í raun vírað í okkur að það kviknar þegar eitthvað óvanalegt er að gerast, eða það er líklegt að eitthvað sem hefur áhrif á velferð okkar gæti verið að gerast. Hins vegar þá er kvíðaviðbragðið sjálft ekkert hættulegt, það er bara óþægilegt,“ segir Anna Sigríður.
Það að bregðast við eins og meiri hætta á ferðum en raunverulega er getur valdið aukinni óþæginda eða kvíðatilfinningu að sögn Önnu. „Því þá fer óttaviðbragðið okkar kannski að virkjast í tíma og ótíma því heilinn heldur þá í raun og veru að það sé svona mikil hætta á ferðum,“ segir hún.
Gott að spyrja börnin
Þess vegna sé mikilvægt að foreldrar bregðist við í samræmi við það sem sé að gerast. „Þegar það eru skjálftar sem hrista hér aðeins og það er ekki ástæða til að bregðast neitt meira við heldur en að bíða það af sér, þá er mikilvægt að segja þeim það.“
Gott sé að spyrja börnin hvað þau séu raunverulega hrædd um að gerist þar sem ótti barnanna snúi stundum að einhverjum sem getur ekki eða mun ekki gerast. Gott er að gera börnum rien fyrir því að þau séu jafn örugg í skólanum og heima.
„Það er brugðist við eins og þarf að gera, hvort sem þau eru þar eða heima hjá sér. Þau halda kannski að jörðin sé að gera eitthvað sem hún er ekki að gera. Það er mikilvægt að vita hvað það er sem þau eru hrædd um,“ segir Anna Sigríður.