„Við höfum tekið þá erfiðu ákvörðun að loka öllum okkar kaffihúsum tímabundið vegna útbreiðslu Covid-19 í samfélaginu okkar. Frá og með þriðjudeginum 24. Mars verða öll okkar kaffihús lokuð og þangað til við teljum óhætt að opna þau aftur.“
Þetta kemur fram í tilkynningu frá Te og kaffi sem skellir í lás tímabundið. Stefnir fyrirtækið á að opna aftur þegar mesta hættan er yfirstaðin. Þar segir enn fremur:
„Þetta er ekki auðveld ákvörðun að taka en er fyrst og fremst tekin með velferð okkar starfsfólks og viðskiptavina að leiðarljósi.“
Kaffibrennslan sjálf mun halda starfsemi áfram og sjá til þess að hægt verði að versla kaffi frá fyrirtækinu í matvöruverslunum. Um tímabundið ástand er að ræða. Þá segir einnig í yfirlýsingunni.
„Við hlökkum til að sjá ykkur öll aftur þegar þetta er afstaðið. Hugsið um ykkar nánustu ástvini, fylgið fyrirmælum yfirvalda og farið vel með ykkur.“