Í gær var tilkynnt um breytingar á landamærunum vegna Covid-faraldursins. Frá og með mánudegi þurfa farþegar að framvísa neikvæðu PCR-prófi eða hraðprófi, hvort sem þeir eru bólusettir eða ekki. Sitt sýnist hverjum um þessar ráðstafanir og í gær sagði Áslaug Arna Sigurbjörnsdóttir dómsmálaráðherra í viðtali á RÚV að hún teldi ekki þörf á aðgerðum á landamærum.
„Á meðan við sjáum að innlögnum sé ekki að fjölga með því, að alvarleg veikindi séu ekki að fylgja því, og bólusetningin sé að varna því að þá myndi ég ekki telja þörf á slíku,“ sagði dómsmálaráðherra í gær.
Einnig var rætt við Svandísi Svavarsdóttur heilbrigðisráðherra í fréttum RÚV í gær og varpaði hún ljósi á ágreining innan ríkisstjórnarinnar um aðgerðir í sóttvarnamálum, sem hefði staðið frá upphafi faraldursins.
„Í raun og veru höfum við séð þessar efasemdir og þessar vangaveltur Sjálfstæðismanna í raun alveg frá byrjun faraldursins um einstaka sóttvarnaaðgerðir. Við höfum nú borið gæfu til þess að sammælast um niðurstöðurnar hverju sinni og þær hafa verið í samræmi við leiðsögn sóttvarnalæknis. Að afloknu samtali stjórnmálanna og vísindamanna þá höfum við komist að farsælli niðurstöðu. Það hefur verið okkar gæfa að fara þessa leið, að vera samferða okkar snjalla sóttvarnalækni í hverju skrefi og ég held að við eigum að halda því áfram. Árangurinn er skýr, þessi staða sem við erum í stenst samanburð við það besta sem gerist í heiminum. Stefnan hefur þess vegna reynst okkur vel og ég held að það sé engin ástæða til að hverfa frá henni,“ sagði Svandís í kvöldfréttum RÚV í gær.
Aðspurð um þau ummæli dómsmálaráðherra, að stjórnvöld hér gengu lengra en annars staðar í Evrópu sagðist Svandís ekki vera sammála því. „Við höfum, í hverju einasta skrefi, horft til sérstakrar stöðu hér - bæði stöðu faraldursins og nú síðast stöðu bólusetninga hér. Sú staða hér innanlands, að hér séu engar takmarkanir innanlands eru einsdæmi, hún er einsdæmi í Evrópu. Ekkert Evrópuríki er með þá stöðu þannig að það er sérstaklega ánægjulegt að við skulum geta verið með þá stöðu hér innanlands og ég auðvitað vonast til þess að við getum haldið þeirri góðu stöðu áfram.“