„Við hjá Strætó erum ekki að missa vitið. Höfum sjaldan verið betri,“ segir Guðmundur Heiðar Helgason, upplýsingafulltrúi Strætó.
Guðmundur svarar gagnrýni Vigdísar Hauksdóttur, borgarfulltrúa Miðflokksins, en Vigdís gagnrýndi harðlega auglýsingu sem finna má á einum af strætisvögnum borgarinnar. Um er að ræða auglýsingu frá Ljósmæðrafélagi Íslands og sýnir teikningu af konum í fæðingu.
Í gagnrýni sinni, sem Vigdís lagði fram á Facebook og Hringbraut fjallaði um í morgun, sagði Vigdís að margir væru viðkvæmir fyrir nekt. Spurði hún hvort „þeir hjá Strætó“ væru að missa vitið.
„Hverju á að ná fram með svona auglýsingum? Nekt er mjög viðkvæm hjá mörgum hópum í samfélaginu - og þetta blasir við börnum sem nota Strætó sem eiga að vera framtíðar kúnnar borgarlínu. Er þetta keypt auglýsing eða að frumkvæði Strætó?,“ spurði Vigdís.
Guðmundur Heiðar segir að um sé að ræða keypta auglýsingu frá Ljósmæðrafélaginu og svarar hann spurningu Vigdísar um það hverju auglýsingin á að ná fram. „Alþjóðaheilbrigðismálastofnunin tileinkaði hjúkrunarfræðingum og ljósmæðrum árið 2020 á þingi sínu en einnig eru 200 ár liðin frá fæðingu Florence Nightingale.“
Guðmundur Heiðar segist ósammála því að teikningin sé dónaleg eða óviðeigandi.
„Þetta er frábær auglýsing sem vekur athygli og notfærir sér dyrnar á vagninum á skemmtilegan hátt. Ljósmæður hafa tekið vel á móti langflestum sem koma í heiminn á Íslandi og það er ekkert nema jákvætt að fagna því.“