Steinunn Ólína Þorsteinsdóttir, leikkona og fyrrverandi fjölmiðlakona, er mikil stuðningskona Sólveigar Önnu Jónsdóttur sem var kjörin formaður Eflingar í gær – nokkrum mánuðum eftir að hún sagði af sér.
Steinunn Ólína skrifaði nokkrar stuðningsyfirlýsingar til Sólveigar meðan á kosningabaráttunni stóð og orti hún fallegt ljóð til Sólveigar í tilefni sigurs hennar í gær.
Ljóðið birti Steinunn Ólína á Facebook-síðu sinni og er óhætt að segja að það sé býsna flott.
Vittu til að vorsins
vakna jarðar blóm
Úr skugganum þau skríða
og skarta björt mót sól
Um andann skalt ei efast
því ekkert bindur laust
Tækifærin gefast
gæfuna þú hlaust
Þau sem verkin vinna
vökul stór og smá
Virðing fyrst þau finna
er frelsi andans ná
þeir sem græða en gefa
ei gömlum höndum gaum
sáran þurfa að sefa
sorgarinnar flaum
Því ekkert er á jörðu
eign þess sem ekki sér
þá þreyttu, þjáð’ og börðu
sem vinna störfin hér
Vittu til að vorsins
vakna jarðar blóm
Úr skugganum þau skríða
og skarta björt mót sól