Hin landsþekkta Steinunn Ólína Þorsteinsdóttir ritaði athyglisverða færslu á Facebook vegg sínum fyrr í dag. Þar deilir hún frétt RÚV um karlmann sem dæmdur var í 90 daga skilorðsbundið fangelsi fyrir að rækta kannabisplöntur í sumarhúsi nokkru.
Í sumarbústaðnum fundust í heildina 17 kannabisplöntur, 1,3 kíló af marijúana og 267 grömm af kannabislaufum. Málið hefur velkst um í kerfinu síðan árið 2019 en ákæra var ekki gefin út fyrr en í ágúst síðastliðnum. Verjandi hans vildi því fá vægari refsingu fyrir þær tafir sem orðið hafa á málinu.
Steinunn segir að kannabis hafi hjálpað eiginmanni sínum heitnum Stefáni Karli Stefánssyni, leikara með meiru, í baráttu sinni gegn illvígu krabbameini fyrir fáum árum síðan. Kannabisið hafi veitt honum ómetanlega aðstoð í veikindunum.
Stefán Karl lést árið 2018 en hann átti farsælan leiklistarferil bæði hér á landi og erlendis. Einna helst verður honum minnst fyrir ógleymanlegar frammistöður í hlutverki Glanna glæps í hinum geysivinsælu þáttum Latabæ. Latibær fór sigurför um heim allan undir nafninu Lazy Town og stal Stefán Karl oftar en ekki senunni.
Steinunn segir kannabis hafa linað þjáningar Stefáns: „Ég vil nota tækifærið og þakka þeim kannabisræktendum sem færðu Stefáni Karli lyfið Kannabis til að lina þjáningar hans og bæta vellíðan í veikindum hans.“
Hún vill endurskoða reglurnar um kannabisnotkun og kannabisræktun: „Kannabis er lystaraukandi og ógleðistillandi sem er mikilvægt fyrir marga krabbameinssjúklinga. Fyrir utan að á stundum færði lyfið honum hjartastyrkjandi hlátursköst sem er ekki síður hollt. Ég er ekki að segja að kannabis sé fyrir alla en dómsvaldið er í ruglinu.“