Héraðsdómur Vestfjarða hefur dæmt karlmann í 60 daga fangelsi fyrir líkamsárás þann 10. júní í fyrrasumar. Atvikið átti sér stað á ónefndri eldsneytisafgreiðslustöð N1 og var maðurinn sakfelldur fyrir að þrífa í peysu afgreiðslumanns og taka hann hálstaki.
Ekki kemur fram hvað varð til þess að maðurinn missti stjórn á sér og réðst á starfsmanninn. Afleiðingarnar urðu þær að starfsmaðurinn hlaut eymsli á jarka vinstri handar og framhandleggs, hrufslár á vinstra handarbaki og grunnt sár hægra megin á hálsi aftarlega.
Ekki tókst að birta manninum fyrirkall í málinu en í dómi kemur fram að vitað hafi verið til þess að maðurinn hefði farið úr landi og dvalarstaður hans væri óþekktur. Maðurinn svaraði því ekki til saka og var málið tekið til dóms.
Maðurinn var dæmdur í tveggja mánaða fangelsi fyrir fíkniefnabrot á síðasta ári og samskonar brot þann 1. apríl í fyrra.
„Að þessu virtu þykir refsing 3 ákærða nú hæfilega ákveðin fangelsi í 60 daga en ekki þykja efni til að skilorðsbinda refsinguna,“ segir í niðurstöðu málsins.
Auk þess að sæta 60 daga fangelsi var manninum gert að greiða fórnarlambi árásarinnar 200 þúsund krónur í bætur. Lögfræðingur fórnarlambsins krafðist 1,5 milljóna.