Séraðgerða- og sprengjueyðingardeild Landhelgisgæslunnar var kölluð út að beiðni lögreglu að húsi í Hafnarfirði í gærdag vegna torkennilegs hlutar sem fannst við jarðvinnu á lóð húss í miðbænum.
Í tilkynningu frá Landhelgisgæslunni kemur fram að við athugun sprengjusérfræðinga Landhelgisgæslunnar hafi komið í ljós að um var að ræða 20mm sprengikúlu úr seinna stríði sem var virk og nokkuð ryðguð, enda komin til ára sinna.
„Sprengjusérfræðingarnir settu sprengjuna í sérstakt box ásamt sandi svo hægt væri að flytja hana til eyðingar. Að auki var jarðvegurinn við húsið grandskoðaður og skimaður með málmleitartæki til að ganga úr skugga um að þar leyndust ekki fleiri sprengjur.“
Þegar búið var að gera sprengikúluna örugga til flutnings var ekið með hana að Stapafelli á Reykjanesskaga og henni eytt á svæði sem notað er til sprengjueyðingar.
Í tilkynningunni kemur fram að sprengjusérfræðingar Landhelgisgæslunnar hafi sinnt óvenju mörgum verkefnum þar sem hermunir úr seinna stríði finnast á víðavangi. Þannig fann vegfarandi sem var í hressingargöngu fyrir rúmri viku virka fallbyssukúlu á hinu svokallaða Patterson-svæði í Reykjanesbæ sem var í góðu ástandi miðað við aldur og var henni eytt af séraðgerðasveitinni.
„Nú þegar búist er við því að landsmenn verði á faraldsfæti innanlands í sumar eru líkur á að sprengjur úr seinna stríði finnist víða um land. Landhelgisgæslan hvetur fólk til að vera á varðbergi og ekki hika við að hafa samband við lögreglu ef torkennilegir hlutir finnast.“
