Söfnun hefur verið sett af stað til stuðnings Snorra Jóhannessyni, bónda á Augastöðum í Hálsasveit í Borgarfirði. Eldur kom upp í íbúðarhúsinu á bænum á sunnudag með þeim afleiðingum að eiginkona Snorra, Jóhanna Guðrún Björnsdóttir, lést. Jóhanna var ein í húsinu þegar eldurinn kom upp.
Á vef Skessuhorns er fjallað um söfnunina og vitnað í Facebook-færslu Árdísar Kjartansdóttur, mágkonu Snorra, þar sem hún segir meðal annars:
„Allmargir hafa haft samband, bæði við okkur og aðra í ættingja- og vinahópi Snorra og Hönnu. Þetta góða fólk vill leggja sitt af mörkum til að gera eftirleikinn bærilegri fyrir Snorra. Þau heiðurshjón voru enda vinmörg, sem ekki er að undra, elskuleg, hjálpsöm, röggsöm, dugleg, brosmild, hláturgjörn og hörkuduglegt eðalfólk. Frábærlega gestrisin og skemmtileg heim að sækja á Augastaði. (Það fyrsta sem mér kemur einmitt í hug þegar ég minnist Hönnu er dillandi hlátur hennar).“
Segir Árdís að til að svara þessu kalli hafi verið stofnaður styrktarreikningur í nafni Snorra, en reikningsupplýsingarnar má finna hér neðst.
Íbúðarhúsið brann til grunna og segir Árdís að Snorri hafi ekki bara misst lífsförunaut sinn heldur heimili og allar eigur.
Reikningsnúmerið er: 0322-13-400032 og kennitalan: 211247-3049
