Svo virðist vera sem framboðið á hvolpum hér á landi anni ekki eftirspurninni. Hún hefur aukist það mikið að tala má um að hundaskortur sé í landinu. Þetta kemur fram í Fréttablaðinu í dag þar sem formaður Hundaræktarfélagsins segir það stóra ákvörðun að fá sér hund.
„Við höfum fundið fyrir auknum áhuga og það er greinilega að aukast að fólk langi í hund,“ segir Herdís Hallmarsdóttir, formaður Hundaræktarfélags Íslands.
Hún segir að vinsælustu tegundirnar sem félagið fær spurningar um þessa dagana séu „flatnefja tegundir“ og þá komi oft fyrirspurnir um labrador, cavalier, miniature schnauzer, íslenskan fjárhund og golden retriever.
Herdís segir við Fréttablaðið að það sé ekki endilega neikvætt að eftirspurn eftir hundum og hvolpum sé meiri en framboðið. „Fókus ræktanda á ekki að vera á það að anna eftirspurn heldur á heilbrigði,“ segir hún.
