Sjálfstæðismenn lýsa margir yfir áhyggjum vegna ummæla Þórólfs Guðnasonar sóttvarnarlæknis á vef Fréttablaðsins í gær. Þykir fólki hann ganga of langt með því að segjast ekki vilja draga of mikið úr sóttvarnarráðstöfunum innanlands vegna mögulegs inflúensufaraldurs og RS veirunnar sem gæti herjað á landsmenn í vetur.
Samband ungra Sjálfstæðismanna sendi frá sér ályktun nú í morgun vegna þessa. Þar segir að „stjórn SUS fagni nýju minnisblaði i forsætis- og heilbrigðisráðherra og þeirri stefnubreytingu sem það virðist marka.“ Þá bæta þau við að það sé orðið löngu tímabært að endurskoða áherslur og aðgerðir í takmörkunum gegn Covid-19.
Stjórn SUS vill afléttingar og það strax. „Orð sóttvarnalæknis í samtölum við fjölmiðla síðastliðna viku bera það aftur á móti með sér að hann telji óskynsamlegt að ráðast í frekari afléttingar, m.a. í ljósi RS vírus og inflúensu, pesta sem hafa komið upp árlega hér á landi síðastliðna öld,“ segir í ályktuninni.
Þeim þykja núgildandi takmarkanir verulega íþyngjandi og ekkert launungarmál sé að þær leggist þungt á almenning hér á landi. Þórólfur gefi lítið fyrir það og sýni þeim hópi óvirðingu.
Þá segir að Ísland eigi að njóta góðs af góðum árangri hér á landi. „Áframhaldandi takmarkanir í landi sem hefur náð jafn góðum árangri í bólusetningum gegn veirunni og Ísland standast vart skoðun, enda er Ísland nú orðið eftirbátur annarra Norðurlanda sem hafa aflétt takmörkunum innanlands með góðum árangri þrátt fyrir að bólusetningarhlutfall þar sé lægra en hér á landi,“ ritar stjórn SUS.
Þau hvetja forystufólk Sjálfstæðisflokksins til þess að beita sér í þessum málum og vilja allsherjar afléttingar. „SUS bendir á að þegar um hvers konar íþyngjandi takmarkanir gagnvart frelsi fólks er að ræða, líkt og nú eru í gildi, þurfa þær að eiga sér ríka lagastoð. Stjórn SUS hvetur þingmenn og ráðherra Sjálfstæðisflokksins til þess að beita sér frekar fyrir því að núgildandi takmörkunum innanlands verði alfarið aflétt.“
Þá ritar Hildur Björnsdóttir borgarfulltrúi Sjálfstæðisflokksins færslu á Facebook þar sem hún baunar á Þórólf.
„Er ekki komið nóg af þessum tilhæfulausa hræðsluáróðri? Jarðhræringar, inflúensa og RS-vírus eru ekki, og hafa aldrei verið, málefnalegar ástæður til takmörkunar á athafnafrelsi almennings.“
Lífið er lotterí og það er hættulegt að taka þátt í því. Það er þó hættuminna vegna gríðarlegs fjölda bólusettra, segir Hildur. „Þátttaka í lífinu hefur alltaf verið hættuspil, en stærsta aðsteðjandi ógnin við líf og heilsu fólks er ekki farsótt, nú þegar 90% fullorðinna hafa verið bólusettir gegn kórónaveirunni. Það er ómögulegt að greina nokkurn ávinning eða ábata af áframhaldandi takmörkunum - hins vegar er miklu til kostað og mörgu fórnað.“
Hún bendir á að fjöldi atvinnugreina hafi borið mikinn skaða af íþyngjandi takmörkunum: „Veitingamenn, listamenn og fjölmargir aðrir hafa orðið fyrir óbætanlegu tjóni af völdum takmarkana sem þjóna ekki lengur almannahagsmunum. Atvinnurekendur um alla borg berjast í bökkum vegna heimatilbúinna skilyrða stjórnvalda, sem eiga sér ekki hliðstæðu í nágrannalöndum. Það er löngu tímabært að endurheimta takmarkalaust samfélag og eðlilegt líf.“
Hildur setur punktinn við færsluna, hikar hvergi og segir: „Afléttingar strax.“