„Ætlar Ísland virkilega að krefja komufarþega um þrjú kórónuveirupróf,“ segir fjölmiðlamaðurinn Sigursteinn Másson á Facebook-síðu sinni.
Sigursteinn gerir þar ummæli Þórólfs Guðnasonar sóttvarnalæknis í Kastljósi í gærkvöldi að umtalsefni. Í þættinum kom fram að Þórólfi hugnaðist að þeir sem koma til landsins þyrftu að skila vottorði um neikvætt COVID-19-próf.
Ekki nóg með það heldur þurfi fólk einnig að fara í skimun við komuna til landsins og fimm daga skimunarsóttkví uns niðurstaða úr seinni sýnatökunni hérlendis kemur. Sum sé þrjár sýnatökur alls ella fara í fjórtán daga sóttkví ef ekki er farið í skimun við komuna til landsins.
Eins og að Umferðarstofa banni akstur bifreiða
„Ég skil vel að Krabbameinslæknir mundi leggja það til að banna sælgæti og sígarettur með öllu, rautt kjöt og áfengi auk þess að einangra reiðiviðbrögð enda sannað að reiðitilfinningar eru stór orsakavaldur krabbameins. Ég mundi líka skilja það á vissan hátt ef Umferðarstofa mundi leggja til bann við akstri bifreiða til að sporna við bílslysum en ég mundi þá treysta yfirvöldum til að taka yfirvegaða ákvörðun og fylgja takmarkað slíkum ráðleggingum,“ segir Sigursteinn sem telur réttast að beita hóflegri aðgerðum.
Hann segir að hlutverk Þórólfs sé að gera ítrustu tillögur um sóttvarnir en hlutverk stjórnvalda sé að sigta út það sem er skynsamlegt út frá heildarhagsmunum, frelsi og mannréttindum. „Það er nefnilega fleira sem skiptir máli í þessari veröld en blessuð veiran þótt merkileg og mikilvæg sé.“
Fráleit hugmynd um veirufrítt land
Margir hafa tjáð sig undir færslu Sigursteins og sitt sýnist hverjum í þessum efnum. Sumir gagnrýna viðhorf Sigursteins og velta fyrir sér hvers vegna hann talar fyrir vægari aðgerðum sem gætu hleypt veirunni inn í landið.
Sigursteinn hefur dvalið erlendis síðustu mánuði, meðal annars á Kanaríeyjum og í Andalúsíu á Spáni, og kveðst hafa kynnst því hvernig langtímaplön og hóflegar aðgerðir virka ágætlega.
„Þetta er alheimsfaraldur og það sýndi sig í haust að hugmyndin um að halda veirunni utan landsins, hugmyndin um einhverskonar veirufrítt Ísland, gengur ekki upp jafnvel þótt gerræðislegum aðferðum sé beitt á landamærum. Dag eftir dag koma nú upp smit á viðkvæmum deildum Landsspítalans. Halda menn virkilega að algjör lokun Íslands, sem krafan um þrefalda skimun þýðir de facto, mundi gera Ísland veirufrítt? Hvorki Norður Kóreu né Nýja Sjálandi hefur tekist að verða veirufrítt og þetta hefur verið upp og niður í Færeyjum eins og á Íslandi. Það sem ég er einfaldlega að segja er að þar til hjarðónæmi hefur verið náð með bólusetningum þá verðum við að hafa hóflegar og skynsamlegar aðgerðir. Það að einblína á veiruna og vera í samfelldu kvíðakasti yfir henni getur haft allskonar aukaverkanir. Sjálfsvígstíðni hefur stóraukist á íslandi og það er ekki minna mál en þessi veira. Íslendingar eru orðnir feitasta þjóðin innan OECD sem er stóralvarlegt heilsufarslegt vandamál. Það er hægt að drepast úr ýmsu öðru en COVID og það er skylda stjórnvalda að hafa heildarhagsmuni að leiðarljósi.“
Hann tekur fram í annarri athugasemd að um leið og sett er fram gagnrýni á hugmyndir sóttvarnalæknis sé sjálfkrafa gert ráð fyrir því að hann vilji hleypa veirunni lausri og sé sama um veikindi fólks eða dauða.
„Þetta er fráleitt og við verðum að komast upp úr slíkum skotgröfum. Nú þegar næstum ár er liðið síðan þessi ósköp dundu yfir þá verðum við að geta rætt málin málefnalega og fordómalaust.“