„Pælið í þessu. Tvöfalt vegakerfi. Nýir, flottir og traustir vegir fyrir þá efnameiri. Fátæka fólkið verður áfram að fara um gamla, holótta og ömurlega vegi.“
Þetta segir Sigurjón M. Egilsson, ritstjóri Miðjunnar, í pistli á vef sínum. Þar gerir hann nýsamþykkta samgönguáætlun sem nær til áranna 2020 til 2034 að umtalsefni. Sigurður Ingi Jóhannsson, samgöngu- og sveitarstjórnarráðherra, skrifar um áætlunina í grein í Morgunblaðinu í dag og segir Sigurjón að þar réttlæti hann nýja flata skatta sem verða innheimtir á vegum landsins.
Í grein sinni segir Sigurður Ingi:
„Allt eru þetta verkefni sem fela í sér verulega styttingu leiða og aukið öryggi en þeir sem vilja ekki nýta sér þessi mannvirki geta áfram farið gömlu leiðina en munu þá verða af þeim ávinningi, fjárhagslegum og varðandi öryggi.“
Sigurjón segir að með þessu sé ekki verið að gera neitt annað en að taka um tvöfalt vegakerfi. „Stíll núverandi ríkisstjórnarinnar er að leggja á nýja skattar hér og þar og alltaf er sama trixið notað. Flatir skattar þannig að allir borgi sömu krónutölu. Burt séð frá tekjum. Viðleitni ríkisstjórnarinnar til að auka ójöfnuð er mikil og er ráðandi. Þar tekst ríkisstjórninni óvenju vel upp.“
Sigurjón rifjar upp ummæli Sigurðar Inga fyrir síðustu kosningar þegar hann sagði að ekki þyrfti að hækka skatta þó unnið yrði að samgöngubótum. Hafnaði hann til að mynda skattheimtuleið Jóns Gunnarssonar, þáverandi samgönguráðherra, og Sjálfstæðisflokksins.
„Sigurður Ingi snerist á punktinum þegar hann munstraði sig og sinn flokk í ríkisstjórnina. Viðsnúningur Sigurðar Inga var mikill og með þeim mestu sem sést hafa. Og er af nógu að taka.“
