Sigurður G. Guðjónsson lögmaður var til viðtals í fréttaþættinum Dagmál á vefsíðu mbl.is. Þar var KSÍ málið til umræðu, hvernig tekið var á því og aðkoma Sigurðar að umræðunni í kjölfarið á því.
Aðspurður hvers vegna hann hafi fundið þörf hjá sér til þess að tjá sig á opinberum vettvangi um málefni Knattspyrnusambands Íslands og baráttuhópinn Öfga svarar hann því að hann hafi einfaldlega ekki getað orða bundist.
„Ég er þeirrar náttúru gæddur að ég reyni alltaf að spyrja eru hlutirnir eins og þeir eru sagðir. Eru ekki allir saklausir uns sekt þeirra er sönnuð? Ég hef trú á réttarríkinu og réttarkerfinu. Ég vil að það sé leyst úr ágreiningi manna eftir þeim reglum sem gilda í samfélaginu á hverjum tíma,“ segir Sigurður.
Hann bætir við að þetta sé eitthvað sem honum hafi fundist vanta í þá umræðu sem einkennt hefur KSí málið: „Mér hefur þótt vera svolítill misbrestur á því, sérstaklega í kjölfar þess að það geta allir tjáð sig á samfélagsmiðlum – geta í sjálfu sér allir verið eigin fjölmiðill. Þú getur sagt hvað sem er og fjöldinn sér þetta. Þú getur búið til hreyfingar og stundum hafa verið búnar til hreyfingar sem eru taldar góðar, hafa leitt til einhverrar góðrar niðurstöðu. Kannski er hugmyndin að baki þessu að vekja athygli á ofbeldi og ofbeldismenningu, svona almennt séð. Það er auðvitað gott verkefni vegna þess að við viljum auðvitað búa í samfélagi þar sem að ofbeldi er ekki beitt eða er ekki viðurkennt,“ segir Sigurður.
Hann heldur áfram: „Síðan gerist það að þetta fer allt úr böndunum og það er verið að saka eða bera á menn allskyns alvarleg, refsiverð brot. Ofbeldi getur auðvitað verið stundum þannig að það sér ekki á þér líkamlega en það þegar það er farið að segja að þú hafir nauðgað einhverju eða það er viðloðandi einhver nauðgunarmenning í tilteknum hópi, þá ertu auðvitað kominn langt út fyrir þá hugsun að berjast gegn einhverju. Þú ert farinn að saka, stundum ónafngreinda menn, stundum er látið fljóta með hverjir þeir eru, hvað þeir gera og hvar þeir eru. Þá er þetta farið að snúast upp í andhverfu sína.“
Sigurður segir að fjölmiðlar eigi sinn þátt í því hvernig umræðan hefur spunnist: „Mér hefur bara blöskrað það síðastliðin þrjú eða fjögur ár hvað það er hægt að ganga langt og hvað fjölmiðlar hafa jafnvel gengið langt. Tekið við yfirlýsingum, flutt fréttir að þessir eða hinir þekktir einstaklingar hafi gerst sekir um brot gegn hegningarlögum, nauðgun, brot gegn blygðunarsemi eða allt sem er refsiverð háttsemi og það hafa verið fluttar af þessu fréttir eins og þetta sé sannleikurinn.“
Hann talar áfram um fjölmiðla og vandar KSÍ ekki kveðjurnar. „Atlagan sem var gerð af hálfu RÚV á hendur bæði formanninum og ég tala nú ekki um henni Klöru Bjartmarz sem var eiginlega bara ofsótt af RÚV. Það var bara gert grín að því þegar hún var að reyna segja að KSÍ væri að reyna skoða málin í einhverjum ferlum eins og hún talaði um. Það var alveg sama hvað KSÍ sagði, lýsti yfir og sagðist vilja gera, það var bara ekkert nóg fyrir RÚV. Það endar bara með því að formaður KSÍ, mikill sóma maður Guðni Bergsson, frábær knattspyrnumaður, mjög góður lögfræðingur og góð persóna, hann er hrakinn úr starfi. Þetta er einsdæmi. Hann er hrakinn úr starfi vegna þess að það er borið á hann að hann hafi leynt einhverju sem hann hafði verið beðinn um að halda trúnað,“ segir Sigurður.