„Af okri!“ skrifar Sigurður G. Guðjónsson, hæstaréttarlögmaður, í færslu á Facebook.
„Brá mér á kaffihús í miðborginni á dögunum til að kaup mér næringu í örstuttu hléi á aðalmeðferð í dómhúsinu við Lækjartorg. Keypti tvöfaldan latte (kaffi með mikilli mjólk) á 805 kr. með vski. Af því ég tók hann með mér í umhverfisvænu pappamáli með umhverfisvænu plastloki þá greiddi ég 5 kr. fyrir það en þó án vsk, hvernig sem það má nú vera hægt, svona stutt frá skattinum og stjórnarráðinu með alla sína skattheimtu og skatteftirlit,“ skrifar Sigurður.
„Þá keypti ég mér eitt örlítið engifer-og eplaskot í plastflösku umhverfisvænni og innfluttri. Þau herlegheit kostuðu 465 kr með vsk. Þurfti ekki að borga fyrir það að taka þessar umbúðir með mér. Loks keypti ég eina epla og kanilskonsu sem kostaði 895 kr.
Fyrir þessi herlegheit greiddi ég 2.170 kr. af því fékk ríkiskassinn 215 kr í formi vsk. af 2.160 kr. Af hverju kassinn fékk ekki skatt af 5 kr í þessum viðskiptum er mér hulin ráðgáta.
Niðurstaðan er hins vegar sú að þetta er lítið annað en okur,“ bætir Sigurður við og birtir mynd af kvittuninni.