Séra Karl Sigurbjörnsson, biskup emiritus, miðlar reynslu sinni af mótlæti í lífinu í nýjum þætti á Hringbraut í kvöld, Tilverunni, en með honum má segja að kirkjan komi til fólksins og miðli boðskap sínum á öldum ljósgjafans.
Þátturinn er unninn í samvinnu við Biskupsstofu á tímum þegar fólkið getur ekki lengur fjölmennt í kirkjuna sína – og því var brugðið á það ráð að fá guðfræðingana Svein Valgeirsson, Dómkirkjuprest og Steinunni Arnþrúði Björnsdóttur, prest í Neskirkju til að stjórna vikulegum þætti um manneskjuna og trúna á tímum mótlætis og kvíða.
Séra Karl er aðalgestur þáttarins í kvöld og segir frá glímu sinni við illvígan sjúkdóm og þær aðstæður þegar andinn er við það að bugast og auðvelt er að reiðast guði sínum, en meðal annars efnis í þættinum er hugvekja frá nývígðum presti, Aldísi Rut Gísladóttur og viðtal við Pétur Georg Markan, samskiptastjóra Kirkjunnar um þjónustu hennar á þeim sérstöku tímum sem nú vara.
Þátturinn byrjar klukkan 20:00 í kvöld og verður sýndur vikulega fram á vor.