Max Schwartzman, menntaskólanemandi í South Windsor í Connecticut í Bandaríkjunum, ákvað í sumar að senda nær öllum þjóðarleiðtogum heimsins bréf. Hann sendi alls 186 þjóðarleiðtogum bréf, fékk tuttugu svör og segir hann að svarið sem hann fékk frá Guðna Th. Jóhannessyni, forseta Íslands, sé í miklu uppáhaldi.
Fréttablaðið sagði frá þessu á vef sínum.
Schwartzman segir að tilgangurinn hafi í raun verið tvennskonar: hann á sér þann draum að starfa í bandarísku utanríkisþjónustunni og þá er hann ritstjóri skólablaðsins, The Bobcat Prowl, og langaði að skrifa grein um svörin sem hann fékk.
Hann spurði þjóðarleiðtogana einnar spurningar: „Hvað finnst þér að ungir Bandaríkjamenn ættu að vita um þjóð þína eða þig?“
Hann segir við staðarmiðilinn Fox61 að svarið frá Guðna hafi verið í miklu uppáhaldi hjá honum. Þannig var bréfið það eina sem var handskrifað og þá var það líka á persónulegum nótum hjá Guðna.
„Það var mjög fallega orðað og persónulegt. Hann lét eftirskrift fylgja í lok bréfsins þar sem hann talaði um að bærinn okkar (South Windsor) hafi verið stofnaður sama ár og Alþingi Íslendinga var endurreist. Hann minntist einnig á að einn af meðlimum hljómsveitarinnar Toto væri frá South Windsor.“