Sema Erla Serdar, stjórnmála- og Evrópufræðingur, gagnrýndi í gær myndband þar sem má sjá hinn þjóðþekktu grínista Pétur Jóhann Sigfússon leika asíska konu þeim Birni Braga og Agli til mikillar skemmtunar. Semu þótti myndbandið vera gott dæmi um rasisma, kvenfyrirlitningu og forréttindablindu hvítra karlmanna.
„Ég stend við allt sem ég sagði um framkomu og hegðun þessara manna,“ sagði Sema á Facebook í dag. Hún lýsir því að hafa fengið holskeflu skilaboða í kjölfar þess að hún tjáði sig um málið.
Hótuðu að skjóta fjölskyldumeðlimi
„Þrátt fyrir ótrúlega áreitni síðasta sólarhringinn frá þeim sem tóku þetta til sín (og ættu frekar að eyða tíma sínum í að íhuga vel hvers vegna það er í stað þess að áreita mig), þrátt fyrir hótanir um ofbeldi og að fjölskyldan mín yrði skotin. Þrátt fyrir það þá stend ég við það sem ég sagði og ítreka það hér með.“
Þrímenningarnir úr myndbandinu hafi sýnt af sér rasíska hegðun og viðbrögð aðdáendahóps þeirra hafi staðfest allt sem Sema hafði sagt með eigin viðbrögðum.
„Þessar "fyrirmyndir" ala á fordómum og kvenfyrirlitningu hjá aðdáendum sínum og ýta undir slíka hegðun hjá þeim. Það sást skýrt á sorpinu sem fylgdarlið þeirra skildi eftir á instagraminu hjá mér og einkenndist af sömu efnistökum og varð til þess að ég þurfti að loka fyrir athugasemdir þar.“
Sema ein í forsvari
Viðbrögðin sýni fram á hversu langt er í að fordómum, kvenhatri og rasisma verði útrýmt á Íslandi.
„Ein skýrasta birtingarmynd þess er að ÉG hef verið gerð að aðal persónu þessarar sögu, sem hefur í raun ekkert með mig að gera. ÉG er látin sitja fyrir svörum og látin skýra það sem MÉR gekk til. Á sama tíma krefst enginn þess að þessir "flottu" og "frægu" gaurar svari fyrir ógeðfellda framkomu sína. Það er enginn að biðja þá um að svara fyrir hegðun sína, rasisma sinn og kvenfyrirlitningu. Nei, ÉG er vondi gæjinn í þessar hryllingsmynd.“
Rasismi drepur
Sema bætir við að hún muni ekki hika við að afhjúpa fordóma þekktra einstaklinga aftur gerist þeir sekir um slíkt. „Ég mun ekki sykurhúða kvenfyrirlitningu eða tipla á tánum í kringum rasisma. Ég mun ekki þegja eða hugsa mig tvisvar um áður en ég afhjúpa fordóma og rasisma. Ég hef aldrei gert það og sé enga ástæðu til þess að byrja á því núna.“
„Rasismi er aldrei í lagi, óháð því hvernig hann er settur fram eða hver setur hann fram. Rasismi er ofbeldi. Rasismi er hættulegur. Rasismi drepur!“
Ekki náðist í Pétur Jóhann við gerð fréttarinnar.