„Ef ég gæti farið aftur í tímann þá myndi ég hætta við þennan viðburð,“ segir Bob Hannaford í samtali við bandaríska fjölmiðla.
Bob þessi tók að sér að skipuleggja svokallað swingpartý á dögunum en afleiðingarnar urðu þær að nú er 41 einstaklingur sem mætti með COVID-19.
Viðburðurinn, sem gengur undir nafninu Naughty in N‘awlins og fór fram í New Orleans, dregur að sér að allt að þúsund pör á hverju ári en vegna kórónuveirufaraldursins var eftirspurnin nú minni en oft áður.
Um 250 einstaklingar mættu á svæðið og segir Bob að reynt hafi verið til hins ítrasta að halda uppi ströngum sóttvarnarráðstöfunum. Þannig var grímuskylda, fólk hvatt til að halda góðri fjarlægð og loks var boðið á skimanir fyrir COVID-19.
Viðburðurinn, sem dreifðist yfir nokkra daga, fór fram á NOPSI-hótelinu um miðjan nóvember, eða rétt áður en 100 manna samkomutakmarkanir innandyra tóku gildi vegna fjölgunar smita. Bob segist miður sín vegna málsins, hann hafi talað við flesta þeirra sem veiktust og sem betur fer sé enginn alvarlega veikur enn sem komið er.
Hann segir að fólk hafi passað allar smitvarnir vel í fyrstu en þegar líða fór á viðburðinn hafi fólk orðið kærulausara. Það sé líklega ástæða þess að hópsmitið kom upp.