Sjónvarpskonan Lóa Pind Aldísardóttir greinir frá því á Facebook síðu sinni að gjaldtaka sé hafin aftur á nýjan leik á bílastæðunum við upphaf gönguleiðarinnar að eldgosinu í Meradölum.
„Mér varð litið inn í heimabanka appið mitt og rak þá augun í nýja rukkun frá félagi sem ég kannast ekki við. Fer að gúgla og átta mig á að þetta er rukkun fyrir bílastæði,“ segir hún.
Hún segist ekki hafa vitað að gjaldtökunni en hún fór að gosstöðvunum nokkrum klukkustundum eftir að sprungan opnaðist.
„Hvergi sá ég skilti eða upplýsingar um að við yrðum rukkuð um nærri 5000 krónur fyrir að leggja bílnum á mölinni,“ segir Lóa og spyr:
„Er ekki lágmark að fólk sé upplýst um að það sé að kaupa sér þjónustu??“
„Bara svo ég taki það fram, að ef landeigendur hafa borið kostnað af því að leggja stíga, þá finnst mér sjálfsagt að greiða fyrir það en það truflaði mig að hafa ekki haft hugmynd um að þetta væru gjaldstæði,“ segir Lóa síðan í athugasemd við færsluna.
