Maður að nafni Kristinn Kristinsson hefur ranglega verið bendlaður við morðið á manni á Ólafsfirði að undanförnu, en hann greinir frá þessu í samtali við DV.
„Ég er saklaus. Þetta er búið að vera stanslaust helvítis áreiti með árásum á mig síðan ég fór suður til að sækja vinkonu mína,“ segir Kristinn, en hann og eiginkona hins látna eru góðir vinir.
Tvær konur og einn karlmaður eru í gæsluvarðhaldi vegna rannsóknar á málinu. Hinn látni hefur verið nafngreindur í fjölmiðlum, en hann hét Tómas Waagfjörð og var hann á fimmtugsaldri.
Eins og kemur fram í frétt DV birti Tómas myndband þar sem hann segir að fyrrnefndur Kristinn hafi hótað sér lífláti og jafnframt hótað að myrða son hans. Myndbandið fór á mikla dreifingu á samfélagsmiðlum og hafa margir áætlað að Kristinn hafi verið sá sem stakk Tómas til bana. Sannleikurinn er hins vegar sá að Kristinn var ekki viðstaddur þegar Tómas lét lífið.
Kristinn segir að lögfræðingurinn hans hafi bannað sér að tjá sig um málið, en hann hafi einfaldlega þurft að segja eitthvað eftir að hann hafi verið ranglega bendlaður við voðaverkið. Hann hefur þá aldrei verið handtekinn vegna málsins.
Hægt er að lesa grein DV hér.
