Pétur Pétursson þjálfari Íslandsmeistara Vals í fótbolta sparaði ekki stóru orðin í garð ÍTF, hagsmunasamtök félega í efstu deildum á Íslandi.
„Ég óska eftir því að ekki einasti maður frá ÍTF komi nálægt verðlaunaafhendingunni á morgun," sagði Pétur við Fótbolta.net í dag.
Valur tryggði sér Íslandsmeistaratitilinn í Bestu deild kvenna um síðustu helgi og á að fá skjöld fyrir sigur á mótinu í síðasta heimaleiknum á morgun.
Pétur hefur gagnrýnt KSÍ og ÍTF harðlega á síðustu dögum vegna þess að lokaumferðin í Bestu-deild kvenna fer fram 14:00 og því skerst verðlaunaafhendingin á við úrslitaleik FH og Víkings í Mjólkurbikar karla sem hefst 16:00.
Orri Hlöðversson formaður ÍTF sem eru hagsmunasamtök félaga í efstu deildum mun afhenda Skjöldinn ásamt Vöndu Sigurgeirsdóttur formanni KSÍ.
„Ég hefði miklu frekar viljað fá sjálfsafgreiðslu eins og í Krónunni," sagði Pétur í dag. „Menn sem hafa tekið svona ákvörðun og ætla ekki að skipta um skoðun ættu ekki að koma nálægt svona afhendingu því ÍTF ber ekki virðingu fyrir okkur," sagði Pétur við fótbolti.net
„Það er ekki að neinu leiti rökrétt að fólk sem tekur svona ákvarðanir komi brosandi til okkar og afhendi okkur verðlaun sem þeim er nákvæmlega sama um. Þeir hafa vitað af þessu í næstum því eitt ár," bætti hann við að lokum.