Heiðrún Finnsdóttir, dóttir Finns Einarssonar sem lést í vélhjólaslysi ásamt konu sinni, Jóhönnu Sigríði Sigurðardóttur, á Kjalarnesi í sumar, segir að faðir hennar hafi haft miklar áhyggjur af lélegu malbiki á vegum landsins.
Heiðrún var gestur Kastljóssins í gærkvöldi þar sem hún ræddi slysið. Eins og greint hefur verið frá myndaðist fljúgandi hálka á veginum sem hafði verið mablikaður skömmu fyrir slysið. Í ljós kom að galli var í malbikinu með þeim afleiðingum að vegurinn varð mun hálli en kröfur segja til um. Í skýrslu sem Vegagerðin birti í síðustu viku stóðst malbikið hvorki kröfur um holrýmd né viðnám.
Heiðrún segir að faðir hennar hafi haft áhyggjur af lélegu malbiki á vegum landsins.
„Pabbi var mjög meðvitaður um þetta. Þetta var eitthvað sem hann hafði bölvað í sand og ösku, og hann lá ekkert á skoðunum sínum um malbik og vegi. En hann var mjög meðvitaður um þetta,“ sagði Heiðrún í viðtalinu en Jóhanna Sigríður var stjúpmóðir hennar. Þau voru 54 og 53 ára þegar þau létust og í blóma lífsins.
Í viðtalinu lýsti Heiðrún óánægju sinni með frágang Vegagerðarinnar og verktaka hennar í sumar.
„Það ætti öllum að vera ljóst að þarna er stórhættulegt malbik á ferðinni því það er spegilslétt. Bílarnir sem stoppuðu í stutta stund tóku tjöruna með sér þegar þeir fóru af stað. Þetta átti ekkert að fara fram hjá svona reynsluboltum,“ sagði hún meðal annars.
Hér má sjá umfjöllun Kastljóssins í gærkvöldi.
