Óttar Guðmundsson læknir segist í bakþönkum sínum í Fréttablaðinu orðinn þreyttur á að fá ráð frá allskonar fólki sem hann óskaði ekki eftir.
„Allir virðast hafa meiri áhyggjur af mér í ellinni en ég sjálfur og vita hvað mér er fyrir bestu. Fólki finnst að ég eigi að að hætta að vinna og fara að spila golf. Ég á að flytja úr Hlíðunum í blokk fyrir gamlingja með lyftu, lokuðum svölum og samkvæmissal,“ segir Óttar og að hann fái einnig ráð varðandi mataræði, hreyfingu og hvers konar bíl hann á, eða ekki.
„Face-bókin hefur að geyma alls konar viturlegar ráðleggingar um málfar og almenna pólitíska hegðun. Endurmenntun ráðleggur mér að fara bæði á námskeið í hagnýtu fjármálalæsi og heimasíðugerð,“ segir Óttar.
Hann segir að við þetta hugsi hann til Ólafs í Laxdæla sögu.
„Hann sagði einhvern tíma að heimskra manna ráð versnuðu eftir því sem þeir kæmu fleiri saman. Ólafur var forspár í þessu tilliti. Mörgum öldum síðar varð Internetið ráðandi í allri umræðu þar sem bullið og „heimskra manna ráð“ tóku öll völd.“
Hægt er að lesa bakþanka Óttars á vef Fréttablaðsins.