Nú er tíminn til að slaka á og anda betur, svo og að næra sálina undir leiðsögn eins færasta og virtasta jógakennara landsins, Auðar Bjarnadóttur, en hún byrjar með nýja þáttaröð á sjónvarpsstöðinni Hringbraut í kvöld klukkan 21:30.
Í þáttunum, sem eru 15 mínútur að lengd, miðlar Auður reynslu sinni á sviði mannræktar – og talar beint til áhorfenda heima í stofu sem líklega þurfa meira á því að halda en nokkru sinni að staldra við og horfa inn á við.
Sjálf hefur Auður stundað andlega íhugun um árabil – og vakið verðskuldaða athygli fyrir leiðsögn sína á því sviði. Hún á og rekur Jógasetrið í Skipholti þar sem hún, ásamt samkennurum sínum, býður upp á fjölda jóganámskeiða.
Hún útskrifaðist sem Kundalini jógakennari árið 2005 í Nýju Mexíkó og er einnig með kennararéttindi í Yoga Nodra og Yoga Therapíu. Þá útskrifaðist hún sem dáleiðslutæknir haustið 2010 frá The International School of Clinic Hypnosis.