Ole Jakob Volden parketslípari á Akranesi er hugmyndaríkur maður ef marka má frumlega lausn hans í baráttunni gegn lúsmýi sem herjar nú mjög á landann. Hann deildi á Facebook-síðu sinni mynd af gildrunni sem fjallað er um á vef Skessuhorns.
Lúsmýargildra Ole er einföld. „Lúsmýið kemur flögrandi og sér eitthvað sem það heldur að sé sykur. En veit ekki að þetta er salt og verður alveg rooosalega þyrst. Flugan fer þá og fær sér að drekka það sem hún heldur að sé vatn, en er í raun romm eða vodki. Hún verður blindfull, labbar áfram, dettur um spýtuna og rekur hausinn í steininn og alveg steinrotast,“ skrifar Ole.