Mynd dagsins að þessu sinni sýnir nokkuð gamla forsíðu af tímaritinu Séð og Heyrt. Eins og kunnugt er hjólaði Davíð Þór af krafti í Katrínu Jakobsdóttur og félaga hennar í VG vegna innflytjendamála sem hafa verið í deiglunni að undanförnu.
Davíð lét býsna stór orð falla á Facebook í gær vegna brottvísana hælisleitenda frá Íslandi. Sagði hann meðal annars að „fasistastjórn VG“ hefði ákveðið að „míga“ á Barnasáttmála Sameinuðu þjóðanna. „Það er sérstakur staður í helvíti fyrir fólk sem selur sál sína fyrir völd og vegtyllur,“ sagði hann enn fremur.
Davíð Þór og Katrín voru par fyrir löngu síðan en þau kynntust í Gettu betur þar sem Katrín var stigavörður.
„Og ég átti því láni að fagna að ég náði að heilla hana á móti. Við byrjuðum saman sem par og það skrúfaði niður þennan lifnað og við fórum að búa saman. Hún heitir Katrín Jakobsdóttir og er í dag formaður VG,“ sagði hann í viðtali við Morgunblaðið árið 2016. Þau voru saman í sjö ár og hættu saman árið 2004.
Þetta hefur verið rifjað upp á Twitter eftir eldræðu Davíðs Þórs í gær.
Tímarnir breytast og mennirnir með pic.twitter.com/NO0MhQa8RY
— Kolbrún Birna (@kolla_swag666) May 24, 2022
