Könnunarfyrirtækið Maskína leiðrétti á fimmtudag framsetningu Morgunblaðsins á könnun sem fyrirtækið vann fyrir hóp verslunareigenda sem nefnist Miðbæjarfélagið.
Í frétt sem birtist í Morgunblaðinu var sagt að niðurstöður könnunarinnar sýndu að meirihluti íbúa höfuðborgarsvæðisins væri á móti því að göngugötur yrðu allt árið í miðborg Reykjavíkur til framtíðar.
Hið rétta er að könnunin bendir til þess að 44,2 prósent íbúa á höfuðborgarsvæðinu, eða stærstur hluti aðspurðra, séu á móti því að Bankastræti, Laugavegur alla leið frá Hlemmi að Þingholtsstræti og neðri hluti Skólavörðustígs verði gerður að göngugötu allt árið.
Þetta kemur fram í frétt á vef Maskínu sem Kjarninn greindi fyrst frá.
41 prósent fylgjandi
Til samanburðar sögðust 41,1 prósent aðspurðra vera fylgjandi því að þetta svæði yrði gert að varanlegri göngugötu en þetta hefur nú verið leiðrétt í netútgáfu fréttar Morgunblaðsins.
Aðspurðir hvort íbúar höfuðborgarsvæðisins teldu sig líklegri eða ólíklegri til þess að heimsækja miðborg Reykjavíkur ef þessar breytingar yrðu gerðar, sagði stærstur hluti svarenda, eða 37,4 prósent, að það myndi engu breyta fyrir sig.
35,6 prósent sögðu að ólíklegra væri að þeir myndu heimsækja miðborgina eftir breytingar og 27 prósent svöruðu að það væri líklegra að þeir myndu sækja miðborgina heim ef þar væru göngugötur allt árið.
Borgarbúar jákvæðir
Lokanir fyrir bílaumferð í miðborginni hafa verið grundvöllur deilna milli verslunareiganda og borgaryfirvalda um langa hríð.
Var það til að mynda umdeilt meðal kaupmanna þegar hlutar Laugavegar, Skólavörðustígs og Vegamótastígs voru gerðir að varanlegum göngugötum í fyrra.
Samkvæmt könnun sem Maskína vann fyrir Reykjavíkurborg í fyrra voru 64,5% aðspurðra jákvæðir gagnvart varanlegum göngugötum.
Þess ber að geta í þeirri könnun voru einungis borgarbúar spurðir álits en ekki íbúar höfuðborgarsvæðisins líkt og í könnuninni sem Morgunblaðið gerði að umfjöllunarefni sínu.